Bashkimi Evropian duhet t’i shkurtojë fondet Hungarisë, nëse qeveria e Viktor Orban vazhdon të refuzojë kuotat e shpërndarjes së refugjatëve brenda bllokut, tha ministri gjerman i drejtësisë Heiko Maas për DPA.
“Ne duhet të rrisim presionin mbi vendet që besojnë se mund të shpërfillin ligjin. Kur ligji shkelet, duhet të ketë një sanksion”, tha ai.
Hungaria kishte ngritur një padi në Gjykatën Evropiane të Drejtësisë, që kërkonte anulimin e një kuote të detyrueshme, që synon të shpërndajë deri në 120,000 refugjatë nga Italia dhe Greqia në të gjithë BE-në.
Gjykata e mbështeti skemën me një vendim të mërkurën. Por kryeministri hungarez Viktor Orban tha se qeveria nuk do të ndryshojë qëndrimin e saj për të kufizuar kuotat dhe premtoi të tjera sfida ligjore dhe politike.
Mass tha se shkelja e vendimit të Gjykatës duhet të rezultojë me pasoja financiare.
“Kushdo që shkon kundër kohezionit evropian në çështjen e refugjatëve, nuk mund të llogarisë më solidaritetin evropian rreth çështjeve financiare”, tha Maas, një politikan socialdemokrat i qendrës së majtë që ka shërbyer si ministër i drejtësisë që nga viti 2013.
Sipas skemës së zhvendosjes të vitit 2015, Hungaria është e detyruar të marrë 1.229 refugjatë. Deri tani nuk ka marrë asnjë.
Hungarisë iu bashkuan edhe Polonia dhe Sllovakia, duke u shprehur kundër kuotave në Gjykatë.
Sipas shifrave më të fundit të publikuara nga Komisioni Europian, gjithsej 27,695 njerëz janë zhvendosur nga Greqia dhe Italia.
Kjo do të thotë se pothuajse dy vjet pas prezantimit të skemës, vetëm 28.2 % e refugjatëve janë pranuar nga shtetet anëtare të BE. /tesheshi.com/
