Në një kohë kur ekonomia gjermane është në vështirësi dhe fermerët po bllokojnë rrugët e Berlinit me traktorët e tyre në protesta, kancelari Olaf Scholz është në kërkim të një shefi kuzhine që njeh artin e lartë të kuzhinës, duke i ofruar atij një rrogë të majme, siç shkruajnë disa media gjermane.
Shefi i ri i kuzhinës që do të gatuajë për të do të marrë një pagë mujore deri në 3000 euro (neto).
Paga bruto është 3700 euro në muaj, ndërsa përveç bonusit të Krishtlindjes do të jepen edhe 220 euro si ndihmë ministrore dhe 40 euro për turne.
Punonjësi i ri do të punojë në zonën ku ndodhet Kancelaria, ekskluzivisht për zyrën e 65-vjeçarit socialdemokrat.
Përveç kësaj, ai do të jetë përgjegjës për përgatitjen e banketeve shtetërore, vaktet e punës dhe gosti të tjera.
Do të punojë në planifikimin e menusë dhe vakteve, duke mbajtur parasysh shumëllojshmërinë.
Krahas kërkesave për përgatitjen e pjatave të shijshme, shefit të ri i kërkohet të respektojë rregullat e fshehtësisë, deri në skadimin e mandatit të tij, në fund të vitit 2025.
“Dhimbjet e kokës” të Soltz-it
Ndërkohë, kancelarit gjerman i kërkohet të menaxhojë një sërë protestash. Partia ksenofobike AfD po përfiton nga mobilizimet e fermerëve, të cilët po bllokojnë qendrën e kryeqytetit gjerman me protesta.
Fermerët dhe punëtorët e sektorëve të tjerë, me traktorë në qendër të qyteteve, kryesisht Berlinit, bllokojnë rrugët për të protestuar kundër heqjes së subvencioneve të karburanteve, ndërsa AfD përpiqet të tërheqë votuesit nga grupi i të pakënaqurve.
Presidenti i sindikatës së fermerëve, Joachim Rookvid, i bëri thirrje qeverisë të heqë dorë nga planet për të hequr subvencionimin e karburantit, duke paralajmëruar se një numër i madh fermerësh do të preken nga vendimi.
Në të njëjtën kohë, sindikatat gjermane po shprehin zemërimin e tyre për kostot e larta të energjisë, burokracinë në rritje dhe mungesën e dialogut social.
Përfaqësuesit e restoranteve nga ana e tyre kërkojnë tërheqjen e rritjes së fundit të TVSH-së në restorante nga 7% në 19%. /tesheshi.com/
