Grumbuj eshtrash janë gjetur brenda në kishën ortodokse serbe e cila gjendet në varrezat e serbëve në jug të Mitrovicës.
Eshtrat janë gjetur gjatë punës së një kompanie që po kryente punimet në rinovimin e objektit fetar, në çastin që punëtorët ka hequr një pllakë ku poshtë saj kanë dalluar një sasi të eshtrave.
Gjetjen e eshtrave e ka konfirmuar edhe policia e Kosovës në Mitrovicës. Zyrtarë të kësaj policie i kanë thënë portalin ‘tesheshi’ se në “kishën ortodokse serbe që gjendet në varrezë, gjatë punimeve që janë duke u kryer nga një kompani punëtorët kanë gjetur një sasi të eshtrave”, ka thënë zëdhënësi i policisë së Kosovës për rajonin e Mitrovicës Avni Zahiti.
Zahiti, ka shtuar se zyrtarë të policisë së Kosovës dhe policisë së EULEX-it kanë dalë në vendin e ngjarjes dhe janë duke hetuar gjetjen e eshtrave.
Zahiti ka mohuar që policia të ketë dijeni se cilës periudhë kohore i përkasin këta eshtra, por ka shtuar se zyrtarë të policisë se Kosovës të njësisë së mjekësisë ligjore nga Prishtina janë njoftuar dhe thirrur që të vijnë në vend të ngjarjes dhe të merr me këtë çështje.
Ndërkaq, një polic i Kosovës ka penguar gazetarët në kryerjen e detyrës së tij, duke udhëzuar se çka duhet të shkruajnë.
“Largohuni nga këtu, nuk është mirë të shkruani për këtë punë se po tensionohet situata, ju veç po dezinformoni”, iu ka thënë polici gazetarëve që ishin larg shiritit që kishin rrethuar Kishën, vendin e ngjarjes. /tesheshi.com/
