Kriza e refugjatëve në kufirin e Maqedonisë ka kapur titujt e parë të shtypit në të gjithë botën, së bashku me fotografitë e njerëzve të lënë pa ndihmë dhe të keqtrajtuar. Me mijëra refugjatë kryesisht të ikur nga lufta në Siri e kanë kaluar natën në qiell të hapur, ndërsa kërkojnë të kalojnë kufirin. “Të paktën, lejoni fëmijët”, thonë refugjatët, të cituar nga disa gazeta ndërkombëtare.
Rreth 600 refugjatë janë lejuar të kalojnë gjatë natës, e u transportuan me tren, nisur nga Gevgelija në orën 5 të mëngjesit. Ata janë dërguar në veri të Serbisë, ndalesa e fundit në rrugën drejt Hungarisë dhe zonës pa kufij të Shengenit.
Por, ndërsa mëngjesi zbardhte, me qindra të tjera janë parë të mbërrijnë në stacion duke ecur në këmbë, gra e fëmijë mes tyre.
Familjet u mblodhën rreth zjarreve në qiell të hapur, ndërsa ishin lagur nga shiu gjatë natës. Ata nuk kanë as strehë dhe shumë pak ushqim e ujë.
“Eshtë vërtet ftohtë këtu”, thotë një prej tyre duke treguar se gjatë natës ra shi, dhe një pjesë u strehuan pas një muri, por nuk mundën të flinin.
Treni i ardhshëm drejt Serbisë niset disa orë pas të parit.
Tashmë prej javësh, stacioni i trenit është skenë e kaosit në krizën e refugjatëve të luftës. Mbi 2 mijë refugjatë kërkojnë të ngjiten në trena, duke futur nga dritaret fëmijë të vegjël, ndërsa trenat udhëtojnë me dyer të hapura.
Mbi 40 mijë refugjatë kanë hyrë në Maqedoni në dy muajt e fundit. Rreth 50 mijë mbërritën në brigjet greke vetëm gjatë korrikut.
Qeveria e Maqedonisë thotë se nuk e përballon dot më situatën dhe dërgoi ushtrinë e forcat speciale në kufi, ku u regjistruan edhe përleshje, ndërsa u përdor gazi lotsjellës. /tesheshi.com/
