Kryetari i Odës Ekonomike të Kosovës Safet Gërxhaliu, e ka konsideruar si të arritur të madhe për vendin nënshkrimi e Marrëveshjes së Stabilizim Asocimit në mes të Kosovës dhe Unionit Evropian, duke theksuar se për realizimin e saj të suksesshme është para se gjithash liberalizimi i vizave për qytetarët e Kosovës.
Kreu i Odës ka theksuar se me nënshkrimin e MSA-së Kosovës dhe posaçërisht biznesit të vendit i hapen dyert për pjesëmarrje aktive në tregun prej 500 milion banorësh dhe do t’i rris marrëdhëniet tregtare në mes të Kosovës dhe vendeve të BE-së.
“MSA është marrëveshja e parë e marrëdhënieve kontraktuale mes Kosovës dhe BE-së. Në të njëjtën kohë është forma e parë e themelimit të dialogut politik mes Kosovës dhe BE-së. Kjo marrëveshja është edhe e një rëndësie praktike, sepse kjo do t’i ndihmojë Kosovës që t’i përshpejtojë reformat, forcimin e shtetit ligjor dhe do të ndihmojë më shumë në tërheqjen e investimeve vendore dhe të huaja”, ka thënë Gërxhaliu.
Ai po ashtu ka thënë se MSA garanton edhe cilësi më të mirë të produkteve, ngritjet të konkurrencën në mes të prodhuesve, dhe uljen e çmimeve.
Më tej ai ka shtuar se të gjitha këto përparësi që i sjell MSA do të jetë vështirë të realizohen nëse nuk do të ndodh liberalizimi i vizave, duke theksuar se vetëm me lirinë e lëvizjes nëpër vendet e Unionit Evropian mund të realizohen të gjitha përparësitë që i ka fituar Kosova me MSA./teshehsi.com/
