Nuk po mbarojnë hallet për ish-kryeprokurorin Adriatik Llalla.
Ish-kryeprokurori, pas hyrjes në “Listën e Zezë” të SHBA-së pritet të hetohet nga Prokuroria e Përgjithshme.
Vetë Zëri Amerikës, radioja publike e SHBA-së ka kryer sot një pyetësor në organin e akuzës.
“Prokuroria e Përgjithshme e Republikës së Shqipërisë i jep përparësi integritetit moral dhe profesional të zyrtarëve. Populli shqiptar pret dhe meriton që zyrtarët të punojnë me ndershmëri dhe integritet në të mirë të interesit publik.
U jep mbështetjen e plotë të gjithë prokurorve që punojnë me përkushtim, dinjitet dhe integritet dhe gjithashtu mbështet qëndrimin për ndëshkimin e cilitdo që cënon parimet e Shtetit të së Drejtës”, ishte përgjigja e Prokurorisë.
Rasti i z. Llalla është i pari i një zyrtari të lartë shqiptar ndaj të cilit Shtetet e Bashkuara marrin sanksione të tilla. Javën e shkuar ish-kryeprokurori u tërhoq nga e drejta për të qenë gjykatës në Apel duke preferuar të mbetet jashtë sistemit të Drejtësisë.
Një vendim i cili solli sot dhe ndërprerjen e procesit të rivlerësimit të nisur ndaj tij.
Duke komentuar lëvizjen e pak ditëve më parë të z. Llalla, ambasadori amerikan në Tiranë Donald Lu u shpreh se “tërheqja nuk i shfajëson këta ish zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga Vetting-u, duhet të kenë frikë dhe nga hetimet e pashmangshme penale”, theksoi ambasadori Lu. /tesheshi.com/
