Gati një projektmarrëveshje për klimën në samitin e Parisit

Pas thuajse dy javë diskutimesh, zyrtarët francezë dhe të OKB-së kanë lajmëruar sot në mëngjes se kanë përfunduar redaktimin e një projektmarrëveshjeje përfundimtare mbi klimën, që do t’u paraqitet ministrave rreth orës 11:30.

Ministrat nga më shumë se 190 vende kanë punuar gjatë gjithë natës për të arritur një marrëveshje historike mbi ndryshimin e klimës.

Diskutimet kanë qenë të vështira, dhe projektmarrëveshja është arritur 16 orë pas planifikimit të mbylljes së bisedimeve.

Pas përkthimit në gjashtë gjuhë të materialit dhe pas paraqitjes ministrave, shpresohet që ai të adoptohet në një sesion të posaçëm në pasditen e sotme.

“Gjithçka është në vend për të arritur një marrëveshje universale, ambicioze. Kurrë nuk do të kemi më një moment më të favorshëm se në Paris,” deklaroi Laurent Fabius, ministri i Jashtëm francez.

Ndërsa nuk jepen hollësi mbi atë se çka pëmban projektmarrëveshja, një prej mospajtimeve më të mëdha ka qenë çështja e marrjes përsipër të financimit të luftës kundër ndryshimeve klimaterike. Një tjetër temë e debatuar ka qenë përcaktimi i cakut të ngrohjes me 1.5 gradë. Ndërkohë që vende të cilat janë më të pambrojtura ndaj ndryshimeve klimaterike kanë kërkuar lënien e këtij kufiri, të tjera vende kanë qenë prirura për një kufi te 2 gradët. /tesheshi.com/