Dy kandidatët që kanë shkuar në balotash për të parin e Drenasit, Ramiz Lladrovci nga PDK dhe Isa Xhemajlaj nga NISMA nuk do ta presin janarin e vitit të ardhshëm për të mësuar se cili do të triumfojë, ngase balotazhi do të mbahet gjatë këtij muaji, saktësisht më datë 18 dhjetor.
Kështu kanë marrë vendim anëtarët e Komisionit Qendror të Zgjedhjeve (KQZ) në mbledhjen e mbajtur sot.
Kryetarja e KQZ-së, Valdete Daka, ky propozim vjen pasi fundi i muajit nënkupton shumë festa shtetërore dhe arsyeja tjetër është se ka interes për monitorimin e zgjedhjeve edhe nga ana e monitoruesve evropian.
“Me këtë vendim obligohet sekretariati i KQZ-së që të bëjë përgatitjet e nevojshme”, ka thënë Daka.
Ndryshe, pas zgjedhjeve të djeshme lokale në Drenas anjëri nga kandidatët nuk mori 50 për qind të votave të nevojshme, duke bërë që përherë të parë PDK të dështoi të fitoi në raundin e parë siç ka bërë në 17 vitet e kaluara.
Pra, përfundimisht drenicakët nga Drenasi do ta mësojnë gjatë këtij muaji se kush do t’i qeveris deri në vitin tjetër, pasi siç dihet këto janë zgjedhje të jashtëzakonshme për kryetar pas dënimit nga drejtësia të ish kryetarit Nexhat Demaku.
Zgjedhjet e rregullta komunale sipas kalendarit zgjedhor do të mbahen në muajin nëntor të vitit 2017. /tesheshi.com/
