Ndërsa fushata elektorale ka nisur zyrtarisht prej disa ditësh, askush nuk ,mund ta mohojë se të shumta kanë qenë ironitë, gafat dhe barsoletat që ka treguar kandidati i djathtë për bashkinë e Tiranës, z. Halim Kosova.
Gjatë takimit të sotëm me biznesin, ai dha mbështetjen e tij publike për kandidatin e majtë, Erion Veliaj, duke u kërkuar qytetarëve të votojnë drejtimin e duhur, i cili është slogani i koalicionit të majtë.
“Një njeri me provë, me fakte të dukshme dhe të prekshme, transparent gjithmonë me qytetarët, është garancia më e madhe që vota e çdo njeriu do shkojë në drejtimin e duhur. Unë këtë kam në dorë, që emrin tim ta vë në tavolinë. Pse e kam bërë këtë, sepse kam pas dhe oferta të tjera, por tani jam i bindur se njerëzit më shumë se kurrë mendojnë që individi…”deklaroi sot Dr. Halimi.
Ka qenë deputetja Jorida Tabaku ajo që ka marrë situatën në dorë, duke rrëmbyer mikrofonin e duke u munduar të rregullojë këtë gafë elektorale.
“Mua më pëlqen edhe ironia e doktorit që e përdor gjithmonë drejtimi i duhur se ky është drejtimi i duhur, punë dhe dinjitet. Jo ai tjetri. Punë dhe jo fjalë, ky është drejtimi i duhur”, tha ajo.
Më tej, z. Kosova vijoi: “Jo mor jo. Drejtim i duhur mund ta përdorin të gjithë, por puna është ça ke në mënd ti për drejtim të duhur”.
Ai shtoi: “Nëse ndonjë që thotë, hë se është i lodh, 5 ambulanca i duhen nga mbrapa për të më gjëmu m’u për t’i dhënë ndihmë, pas çdo 500 metra. Po ja u them se matem mirë me i thënë hajde më dil një herë në shesh ta shohim bashkë nëse jam i lodh apo s’jam i lodh. Njëri tani më kërkon lekët e motorit se më tha duke të gjëmu ty m’u prish motori”. /tesheshi.com/
