Pas protestave raciste në Charlottesville të Virginia-s, The Economist, Time dhe New Yorker në kopertinat e këtij muaji e sjellin presidentin amerikan në version nazist, si nxitës i urrejtjes.
Tre revista më të shquara dhe më të lexuara, jo vetëm në SHBA por në mbarë botën, kanë reaguar ndaj polemikave më të fundit që tronditën administratën Trump. Ato kanë përdorur faqen e parë të tyre duke sjellë mesazhin ndaj Trump me art, dhe pothuajse të gjitha e kanë portretizuar si nxitës të gjuhës së urrejtjes.
Shkak u bë reagimi i dobët dhe aspak i qartë i presidentit pas sulmeve të grupeve të supremacisë së bardhë, ku u panë dhe simbole të nazistëve. Këto grupe u përleshën me protestues të majtë që kishin dalë për të kundërshtuar marshimin e tyre në qytet, por Trump në vend që të dënonte dhunën dhe gjuhën e urrejtjes nga organizata të tilla famëkeqe, tha se “dënonte dhunën nga të dyja palët”
“Trump është politikisht i paaftë, moralisht i shterur dhe i papërshtatshëm për zyrën e presidentit. Ndërkohë që Trump nuk është vetë një supremacist i bardhë, ai nuk arriti dot të kalonte testin më të thjesht politik: gjetjen e një mënyre për të dënuar nazistët”, shkruan në trajtesën kryesore të saj këtë muaj revista The Economist duke e portretizuar presidentin amerikan në cover me një megafon, i dizenjuar si simbol i organizatës raciste Ku Klux Klan.
“Përpjekja e tij për të barazuar protestën e ekstremit të djathtë dhe kundër-demonstratën e saj në Charlottesville ishte një paaftësi politike dhe moralisht e gabuar. Paaftësia e tij për të parë përtej hundës sëtij sugjeron që ai nuk ka karakter të ndryshojë”, shkruan më tej The Economist.
Duke marrë shkas nga ky qëndrim i kritikuar gjërësisht revista New Yorker sjellë në kopertinën e saj të gushtit një imazh të skicuar të presidentit që ulet në breg të detit, duke fryrë në një lundër e cila tërhiqet me vela që ngjajnë si kapuçet e bardha të veshura nga anëtarët e Ku Klux Klanit.
Artisti i cili krijoi këtë cover, David Plunkert, tha në Twitter se punimi është titulluar “Blowhard”( një term i përdorur për ata që flasin broçkulla për të rënë në sy).
Ndërsa Time, një revistë me histori shekullore, nuk preferoi imazhin e dukshëm të Trump-it, por siluetën e tij në ngjyrë të zezë, e mbuluar me një flamur amerikan që merr formën e përshëndetjes famëkeqe naziste shoqëuar me titullin “Urrejtja në Amerikë”. Ilustrimi është krijuar nga Edel Rodriguez.
Shkrimi kryesor ngre pyetjen: A do të do t’ia dalë me sukses kombi amerikan pas Charlottesville-s, ku Trump dështoi?!
Presindeti amerikan është në pikët më të ulëta të tij që në kohën kur u zgjodh president. Parardhësi i tij Barack Obama, i pari president i zi, theu rrjetin me një postim në Twitter disa orë pasi Trump dështoi për të dënuar me një gjuhë të qartë dhunën e organizatave të supremacisë së bardhë.
Me një shprehje të Nelson Mandelës: “Askush nuk është lindur me urrejtje ndaj personit tjetër për shkak të ngjyrës së lëkurës së tij, për prejardhjen e tij, apo për religjionin e tij…”, Obama mori më shumë se 3 milionë pëlqime, duke treguar se njerëzit e kanë kujtesën gjallë se çfarë pasojash sjell urrejtja naziste dhe ajo e të bardhëve kundër zezakëve në Amerikë. /tesheshi.com/
Përgatiti Ermir Hoxha – /tesheshi.com/
