Dy kompanitë e mëdha që drejtojnë fushatën e PS-së dhe PD-së, përkatësisht britanikët e Cambell për të majtën dhe amerikanët e Podasta për të djathtën, kanë përcaktuar se fituesi i zgjedhjeve të 21 qershorit do të jetë ai kandidat që do të marrë votat e të ashtuquajturit elektorat të pavendosur që sipas sondimeve të deritanishme është mjaft i madh në numër.
Ndërsa duhet edhe një muaj deri në zgjedhjen e 61 kryebashkiakëve të rinj të Shqipërisë, fushata zgjedhore po jep një trend të ndryshëm nga votimet e mëparshme. Deri më sot duket se është hequr dorë nga konfliktet verbale dhe debati po shkon drejt përplasjes normale programatike.
Ndërsa Kryeministri Edi Rama, nuk resht së përsërituri në takimet e tij të përditshme elektorale që i ngjajnë një logu rrumbullakët me mbështetës, zgjedhjen e kandidatëve të mazhorancë, pasi mundësia e bashkpëunimit me qeverinë do të ishte më e lehtë, lideri i opzitës, Lulim Basha, si “atu” politike ka argumentin e uljes së taksave dhe tarivat vendore nga kryebashkiakët e rinj që do të zgjidhen nga radhët e kandidatëve të Partisë Demokratike.
Duelet më të forta në qytetet e mëdha të vendit, gjithsesi ende po tregohen të kujdesshëm pa një “ring” real goditjesh me njëri tjetrim. Madje, edhe aty ku në fillim pati shigjetime, janë larguar duke synuar vetëm akuzat ndaj formacioneve politike.
Tirana
Kandidati për kryetar bashkie nga ana e mazhorancës, Erjon Veliaj, në të gjitha takimet e deritnishme nuk ka polemizuar asnjëherë me rivalin e tij, mjekun Halim Kosova, por me kryebashkiakun aktual të Tiranës, liderin e opozitës, Lulzim Basha. Strategjia e Veliajt, duket se është akuza ndaj lidershipit të Bashës në 4 vitet e drejtimit të pushtetit lokal. Ndërkohë, dr.Kosova, kandidati i opozitës, fushatën e ka përqendruar tek reputacioni i tij njerëzor dhe menaxherial, duke premtuar një bashkëpunim me qeverinë për çështjet e bashkisë. “Rama është kryeministri im dhe ne do ta gjejmë patjetër rrugën e bashkëpunimit, unë e di si ta bëj këtë”, ka thënë Kosova dhe siç duket kjo do të jetë strategjia e tij për të bindur elektoratin “gri” që në kryeqytet duket në masë jo të vogël. Në ditët e para, Kryeministri Edi Rama, lëshoi disa mesazhe negativiste ndaj kandidatit të PD-së, gjë që krijoi një ilaritet dhe ai u tërhoq nga kjo strategji.
Durrësi
Kandidatja e opozitës, Grida Duma, ka krijuar prej 2 vitesh profilin politik të një polemisteje të zjarrtë dhe akuzatore të fortë të qeverisë, por në muajin e parë të fushatës për kreun e bashkisë së Durrësit, ajo po përdor një gjuhë të butë dhe strategji më shumë “për” sesa “kundër”. Zonja Duma, deri tani nuk ka sulmuar personalisht rivalin e saj, kreun e bashkisë së Durrësit, Vangjush Dako, i cili garon për mandatin e tretë. Ndërsa, edhe zoti Dako po zhvillon një fushatë bazuar në promovim projektesh dhe punësh për qytetin. Përveç një incidenti në fillim, prej të cilit Dako i distancua menjëherë, edhe në Durrës fushata nuk ka pasur eksese.
Shkodra
Me dy gra rivale; Keti Bazhdarin e PS-së dhe Voltana Ademin e PD-së. Shkodra jo vetëm që nuk bën përjashtim nga fushata e qetë, por ajo e nisi dhe e promovoi këtë fenoment që po zhvillohet deri tani. Ditën e djeshme dy kandidatet për të marrë “çelësat e Rozafës” kanë shtrënguar duart publikisht për ta përforcuar mesazhin e një loje fair, edhe pse kahjet e “skifterëve” brenda kampeve reskpektive po shtyjnë në një kacafytje.
Në fakt e njëjta panoramë po ndodh edhe në Korçë, Vlorë, Sarandë, Elbasan, Fier etj, ku temperaturat ngrihen vetëm nëse të mëdhenjtë nga Tirana lëshojnë ndonjë deklaratë ndaj kandidatëve të palëve, gjë që është normale në fushatë. Madje shumë po çuditen pse kjo qetësi, apo mos vallë është “qetësi para furtunës” etj etj. Megjithatë, kompanitë serioze të sondazheve të cilat po bëjnë kërkime permanente, kanë tërhequr një perceptim të publikut, i cili më 21 qershor do t’i gjykojë ftohtë kandidatët dhe vetëm nga bindja që kanë për figurën dhe personalitetin e kandidatit. Të jetë kështu deri në fund…?!
/tesheshi.com/
