Nga Mensur Krasniqi
Pas kalimit të dhjetëditëshit të parë të fushatës zgjedhore në Maqedoni, partitë politike dje në mesnatë kanë dorëzuar raportet financiare deri te Komisioni Shtetëror Zgjedhor mbi paratë e shpenzuara gjatë kësaj periudhe.
Shpenzime më të larta nga partitë politike maqedonase i kanë bërë partia në pushtet VMRO-DPMNE, mbi 700 mijë euro, ndërsa opozita maqedonase e udhëhequr nga LSDM-ja ka deklaruar shpenzimet e rreth 309 mijë eurove.
Nga ana tjetër, partia shqiptare në pushtet në dhjetëditëshin e parë të fushatës zgjedhore ka shpenzuar thuajse 87 mijë euro, ndërsa partia shqiptare në opozitë, PDSH ka raportuar shpenzimet totale prej 7 mijë eurove.
Nga partitë jashtëparlamentare shqiptare, në listën e shpenzimeve më të larta kryeson Lëvizja BESA me afro 80 mijë euro të shpenzuara, gjegjësisht 7 mijë euro më pak se BDI dhe dhjetëfishin e shpenzimeve të partisë opozitare shqiptare, PDSH-së.
Pas Lëvizjes BESA, me shpenzime më të larta rradhitet koalicioni Aleanca për Shqiptarët me 16 mijë euro të raportuara si shpenzime në fushatën zgjedhore, dhe Partia për Prosperitet Demokratik vetëm 4 mijë euro të shpenzuara.
Nga partitë tjera jashtëparlamentare maqedonase është Partia Liberale e cila ka shpenzuar afro 9 mijë eurosh, dhe Koalicioni “VMRO Maqedonia” me 18 mijë euro të shpenzuara.
Nëse bëhet përllogaritja e plotë del se gjitha partitë politike kanë shpenzuar mbi 1 milion e 300 mijë euro.
Se sa mund të jenë reale këto shuma të mjeteve financiare për fushatën zgjedhore, eksperti ekonomiko-financiar Visar Ademi është i mendimit se partitë nuk kanë paraqitur vlerën e saktë të mjeteve të shpenzuara, ndryshe ajo vlerë mund të llogaritet dhjetëfishi i të deklaruarës.
“Aspak nuk janë reale, se shpenzimet reale janë dhjetëfish më të mëdha. Kjo për arsye se vlera e realtë e shpenzimeve nuk kontribuon me gjendjen faktike. Në shpenzimet e deklaruara mund të futen vetëm shpenzimet për promocion dhe marketing por jo edhe qeratë e zyrave të huazuara për shtabe partish por edhe lëvizja nëpër qytete. Këto shpenzime më tepër janë kontribut ose i qytetarëve ose sponsorizim nga biznes elita ose edhe shantazhime. Ndërsa partija në pushtet shfrytëzon edhe mekanizmin institucional ose infrastrukturën shtetërore për të finansuar një pjesë të madhe të shpenzimeve”, deklaroi për portalin tesheshi.com, eksperti ekonomik Visar Ademi.
