Nga Blendi Gashi
Edhe pse kanë kaluar disa javë nga rrëzimi i qeverisë “Mustafa” dhe 11 qershori është shpallur ditë e zgjedhjeve, ministra të caktuar që janë në detyrë po ndajnë fonde të majme për projekte të në prag të fushatës zgjedhore duke përkrahur komuna që qeverisin partitë e tyre, por jo dhe komunat tjera. Kjo bëhet me qëllim që të fitojnë sa më shumë vota në komunat përkatëse dhe njëherit kinse të japin mesazhin se po investojnë për të mirën e vendit.
Së fundmi është ministrja në detyrë e Tregtisë dhe Industrisë që vije nga radhët e LDK-së, Hykmete Bajrami, që ka ndarë fonde për komunat që udhëhiqen nga partia e saj, me ç’rast dje ka nënshkruar dy marrëveshje për funksionalizimin e zonave ekonomike, me komunën e Suharekës dhe Lipjanit.
Bajrami, marrëveshjen e parë e ka nënshkruar më kryetarin e Suharekës, Sali Asllanaj, për bashkëfinancimin e projektit për ndërtimin e Zonës Ekonomike në fshatin Shirokë.
Vlera e investimit në këtë projekt për vitin 2017 është mbi 391 mijë euro, ku prej kësaj shume Ministia e Tretisë i kontribuon me 345 mijë euro ndërsa Komuna e Suharekës me 46 mijë euro.
Në aktin e nënshkrimit ishin prezentë edhe drejtori i Agjencisë për Investime dhe Përkrahjen e Ndërmarrjeve në Kosovë (KIESA), Besian Mustafa dhe kryetari i Shoqatës së Bizneseve në Suharekë, Shaqir Palushi.
Dhe sigurisht ashtu siç pritej, Asllanaj ka falenderuar ministrinë, këtë rast kolegen e partisë për përkrahjen e dhënë duke e vlerësuar se me këtë projekt do të përfitojnë bisneset e kësaj komune.
Po dje, ministrja në largim, Bajrami ka udhëtuar edhe në Lipjan, ku edhe atje ka nënshkruar një marrëveshje me kryetarin Imri Ahmeti për funksionalizimin e Zonës Ekonomike në fshatin Kërqevë të Qylagës, projekt ky në vlerë 385 mijë euro, ku me 345 mijë euro kontribuon MTI-ja.
Dhe ashtu siç pritej edhe kryetari Ahmeti ka folur fjalë miradije për këtë projekt duke thënë se ka benifite të mëdha në kuptimin e mundësive të reja që do të krijohen për të gjithë investitorët e ardhshëm në komunën që udhëheq ai.
“E domosdoshme miratimi i ligjit për qeverinë”
Përfaqësues të shoqërisë civile thonë se në vazhdimësi qeveritë në largim kanë marrë vendime të diskutueshme, pasi kanë shfrytëzuar mungesën e ligjit që do t’ua ndalonte në mënyrë të prerë të marrin vendime të tilla.
Artan Canhasi, hulumtues në Institutin Demokratik të Kosovës thotë se mungesa e një ligji për qeverinë me dispozita që do ta kufizonin pushtetin e një qeverie në largim vërehet gjatë periudhave kur parlamenti është i shpërbërë.
Sipas tij kjo situatë është vërejtur edhe pas shpërndarjes së Kuvendit në maj të vitit 2014 e deri në konstituimin e parlamentit të ri në vitin 2015, kur u morën shumë vendime të diskutueshme, përfshirë emërimin e një numri të nëpunësve të lartë civilë dhe dhënies së një kontrate të madhe për ndërtimin e një autostrade.
“Është vërejtur shumë herë, që nëse ndonjë veprim nuk është i ndaluar në mënyrë eksplicite me ligj, në Kosovë konsiderohet i lejuar. Edhe pse ky mund të mos jetë në pajtim me standardet demokratike që mund t’i vërejmë në demokracitë e zhvilluara. Për këtë arsye është e nevojshme që të miratohet një Ligj për qeverinë që të rregullojë së paku çështjet thelbësore sikurse fuqitë vendimmarrëse të një qeverie në largim për miratimin e buxhetit të shtetit apo emërimin e zyrtarëve të lartë”, thotë Canhasi për tesheshi.com. /tesheshi.com/
