Posedues armësh në Meksikë po u kërkohet t’i dorëzojnë në kisha, edhe kundrejt një pagese shpërblyese. Kjo u njoftua nga presidentja e vendit amerikanoqëndror.
Claudia Sheinbaum siguroi se programi “Po për çarmatimin, po për paqen” garanton se nuk do të ngrihet asnjë akuzë penale kundër kujtdo që dorëzon një armë. Është pjesë e një plani më të gjerë, një “strategjie totale” për rivendosjen e sigurisë, sqaroi ajo.
“Ka të bëjë, në shërbesat e kishës, krijimi i vendeve ku njerëzit mund të shkojnë për të dorëzuar vullnetarisht armët e tyre dhe për të dhënë stimuj financiarë” për këtë, shpjegoi presidentja Sheinbaum gjatë një konference për shtyp.
“Ky (program) do të fillojë vitin e ardhshëm. E bëmë në Meksikë (në kryeqytet) dhe pati rezultate të rëndësishme”, shtoi presidentja, njëherësh ish-kryebashkiakja e megaqytetit me 9.2 milionë banorë.
Në vitin 2023, në Meksikë u regjistruan 31,062 vrasje, 70% e të cilave u kryen me armë, sipas të dhënave ende jo përfundimtare nga instituti statistikor meksikan.
Tre të katërtat e vrasjeve besohet se ishin për shkak të konflikteve midis bandave kriminale mbi kontrollin e territorit ose rrugëve të trafikut të drogës, një pikë që ish-presidenti Andres Manuel Lopez Obrador e përsëriti shpesh.
Qeveria meksikane gjithashtu e lidh dhunën e bandave me trafikun e armëve nga SHBA në vend.
Autoritetet meksikane kanë ndërmarrë veprime ligjore kundër tregtarëve të armëve në SHBA dhe Gjykata e Lartë federale e SHBA-së pritet t’i shqyrtojë ato. /tesheshi.com/
