Më së paku 240 persona kanë humbur jetën nga fundosja e dy mjeteve lundruese në Mesdhe, jo shumë larg brigjeve të Libisë.
Mbi 100 njerëz u mbytën të mërkurën, kur një gomone u përmbys pak pas largimit nga brigjet libiane, siç kanë treguar ca prej 29 të mbijetuarve.
Në një tjetër ngjarje të tillë mëngjesin e së enjtes, 140 persona mendohet të jenë mbytur. Mbytjes ngjan t’i kenë shpëtuar vetëm dy persona.
Një zëdhënëse e agjencisë së OKB-së për refugjatët, Carlotta Sami, deklaroi në një intervistë telefonike se bëhej fjalë për mjete lundruese në gjendje të keqe të fundosura jo shumë larg bregut libian, e për fëmijë, gra e shtatzëna në to.
Numri i të mbyturve në Mesdhe gjatë këtij viti shkon kështu në 4.220, shifra më e lartë e regjistruar.
Përpjekjet e njerëzve të dëshpëruar për të kaluar nga Libia në Itali nëpërmjet Mesdheut mbeten në nivele të larta. Gati 160.000 njerëz kanë arritur këtë vit në Itali nga Libia, duke ia kaluar numrit të përgjithshëm të vitit të shkuar. /tesheshi.com/
