Në fillim ishte Elisa Spiropali që dha dorëheqje, ndërsa sot u larguan dy drejtoreshat e përgjithshme të tatimeve dhe doganave, Briseida Shehaj dhe Pranvera Fagu.
Janë dy portat më të rëndësishme të shtetit ku vilet leku, ku mbushen artat e shtetit. Realisht janë dy zyrat më të fuqishme ku grumbullohen miliardat e miliardat.
Në të kaluarën, kush ka qenë drejtor doganash dhe tatimesh është bërë më pas o ministër, o deputet, o kryetar partie. Kështu ka ndodhur nga Ridvan Bode te Shpëtim Idrizi, e në fund tek Arben Ahmetaj.
Mirëpo, në vitin 2013, Edi Rama prezantoi dy vajza të reja në vend të “ujqve” të vjetër të administratës. Koncepti ishte që të bënte të ditur se nuk do të kishte më “superdrejtorë”, pasi i tillë ishte Edi Rama, por thjesht drejtorë.
Megjithatë, Rama, si përdorues i propagandës perfide, i ktheu “bletët punëtore”, siç i quajti ai, në figurat përfaqësuese të një administrate të tërë. Dhe ky model njësohej me posesivitetin dhe agresivitetin e Briseidës së Tatimeve, si dhe me “intelektualizmin” e sforcuar të Elisa Spiropalit.
Doganat dhe Tatimet janë dy zyra të rëndësishme shtetërore, dhe Rama ka pasur të drejtë që e ka zhdukur modelin kur krerët e doganava dhe tatimeve shndërroheshin në njerëz të frikshëm dhe më të fuqishëm se kryeministri.
Por jo duke krijuar një model që nuk i përshtatej aspak konceptit të burokratit klasik. Askush nuk e di kush është drejtori i Doganave dhe Tatimeve të Gjermanisë apo Italisë.
Dhe askujt nuk i duhet. Kurse Rama i ktheu “bletët” në showgirl të politikës, duke i hapur një telash të paqenë dhe publikut, që duhej të rreshtohej pro apo kundër tyre. Briseida u kthye në frymëzim për Portokallinë, dhe për këtë do të mbahet mend.
Po fundja, pse duhet të mbahet mend një drejtor tatimesh apo dogane?! /tesheshi.com/
