Nga Mensur Krasniqi
Ka patur jehonë një zhvillim interesant në mbyllje të fushatës elektorale në Maqedoni.
Tetova, kryeqendra shqiptare, gjithashtu dhe e politikës së tyre, “ra në duart” e BESËS, partisë së re e cila pretendohet të jetë dhe surpiza e këtyre zgjedhjeve.
Në tubimin përmbyllës të fushatës, ajo shënoi një rekord pjesëmarrjeje në këtë qytet, duhet thënë bastion i dy forcave tradicionale, PDSH-së dhe BDI-së.
Si e para ashtu dhe e dyta, janë ngjizur në Tetovë.
PDSH është e themeluar madje nga tetovari Arbër Xhaferi, tashmë i ndjerë, e po ashtu udhëhiqet nga një tetovar siç është Menduh Thaçi, ku dhe selinë qëndrore e ka në këtë qytet.
Por përkundër kësaj, kjo parti zgjodhi ta mbyll fushatën në Kumanovë, atje ku në fakt është gatuar dhe zhgënjimi më i madh shqiptar ndaj BDI-së. Po ashtu dhe kjo e fundit, vjen nga Tetova. Si parti e dalë nga zjarri i luftës, ajo u ngjiz në lartësitë e këtij qyteti, në Shipkovicën e dominuar nga enverizmi, ku Ali Ahmeti drejtonte shtabin e UÇK-së. Por pas 15 vitesh, gjithçka është fashitur. BDI vërtet e drejton Tetovën me Teuta Arifin në krye të Komunës, por tubimi përmbyllës i saj ishte një shenjë jo e mirë paralajmëruese për humbjen e këtij bastioni.
Ndërsa performanca e BESËS ishte shenjë që kryeqendra shqiptare e Maqedonisë po i paraprin një kthese të fortë politike në zgjedhjet e së dielës.
Kjo ishte hera e parë që Tetova shndërrohet në barometër të preferencave politike; duke qenë po ashtu hera e parë që një parti tradicionale si PDSH-ja zgjedh të dalë jashtë saj për tubimin përfundimtar, e po ashtu një parti e re vendos ta sfidojë dyshen dominuese në qytetin bastion të tyre. /tesheshi.com/
