Nga Etjola Bedo
Kishte kohë që togfjalëshi “fshesë greke” ishte harruar. Rituali i fqinjit tonë jugor që aplikohej sa herë i “ngrihej”…temperatura inatçore për shkak të ndonjë gjëje të papëlqyeshme që vinte nga Tirana zyrtare, është rikthyer për aplikim pas kaq vitesh, pak orë pasi kryemnistri Edi Rama iu përvesh Athinës me një fjalim të pazakontë në parlament, duke përmendur mbi të gjitha fare troç, çështjen çame dhe tragjedinë e kësaj popullate shqiptare nën grekun e dekadave përpara.
Prej dy ditësh, në Kakavijë po shkruhet një tjetër histori e marrëdhënieve delikate mes dy vendeve. Pos të kthyerve, janë dhe me dhjetra shqiptarë të tjerë që nuk u lejohet të kalojnë matanë kufirit, pra zonës Shëngen. Dhe kjo ka bërë që grupe njerëzish, mes tyre fëmijë e të moshuar, ta kalojnë natën jashtë në të ftohtë, me shpresën se mos “i ulet”…inati grekut.
“Ku është shteti ynë”, thërrasin qytetarët e indinjuar, duke shprehur zemëratën e tyre karshi fatit që i detyron të marrin rrugët e kurbetit, e që janë viktima të politikave mes dy vendeve të cilat e ngucin njëra-tjetrën sa herë për arsye nacionale. Disa të tjerë do shkonin në Greqi për të vizituar të afërmit; e mes tyre një që është bërë gjysh, me padurimin për të parë nipçen e vogël, por që përgjigjja e dhënë nga policia greke Kakavijës ka qenë një kryq në pashaportë.
Me çantën në krah, ai thotë se ka tentuar brenda kësaj jave mbi 4 herë që të kalojë, por është shpallur person i padëshiruar për Greqinë.
“Po çkemi bërë për ta meritur këtë përbuzje? Na kërkojne dokumenta, garanci, para me vete, të gjitha i kemi, por këta tallen me ne”, shprehen qytetarët që kane qëndruar për më shumë se dy netë në kufirin greko-shqiptar.
Nga ana tjetër, vetëm në 24 orët e fundit, janë kthyer mbi 120 shtetas pa iu dhënë asnjë shpjegim. Policët shqiptarë rrijnë e bëjnë sehir, të pafuqishëm për të bërë diçka. Nganjëherë rrijnë në heshtje, e nganjëherë nisin e këmbejnë batuta mërzie me njëri-tjetrin për ta shtyrë turnin, gjë që i acaron edhe më tepër fatkeqët. Dhe nëse këta të fundit i pyet se kë konsiderojnë përgjegjës për këtë situatë, edhe pse grekun e kanë në majë të gjuhës, sërish gishtin e drejtojnë kah shteti shqiptar, ai që duhet t’u japë zgjidhje, duhet t’i mbrojë, t’u ruajë dinjitetin e nëpërkëmbur.
Çdo fajtor duhet të marrë përsipër të shlyejë detyrimet ndaj njerëzve të pafajshëm”, të thonë dhe nuk është e vështirë të kuptohet që e kanë me Ramën dhe fjalimin e tij.
Në Kakavijë bën ftohtë, e njerëzit janë edhe të acaruar. Fjalimi i kryeministrit mund të shijojë në kushte shtëpie e kur Greqinë e sheh në distancë. Ndërsa aty ngjan tejet i hidhur…/tesheshi.com/
