Qindra zyrtarë qeveritarë, përfshirë këtu edhe personelin ushtarak dhe të sigurisë, janë arrestuar në Arabinë Saudite me akuzat e ryshfetit dhe shpërdorimit të detyrës.
Komisioni Kombëtar Kundër Korrupsionit në Arabinë Saudite (Nazaha) njoftoi mbrëmjen e së dielës se hetuesit gjithashtu do të paraqesin akuza kundër atyre që janë aktualisht në paraburgim.
Në vitin 2017, forcat e sigurisë arrestuan disa princa dhe anëtarë të elitës politike dhe të biznesit, si pjesë e reformave të paraqitura, e në këtë kuadër si një përpjekje për të luftuar korrupsionin.
Personat e arrestuar u mbajtën në hotelin luksoz Ritz-Carlton në Riad, ku për disa dyshohet se janë abuzuar fizikisht.
Sipas ekspertëve, Princi i Kurorës Mohamed bin Salman përdori spastrimet për të larguar njerëzit që ishin potencialisht një kërcënim politik për të.
Një gjykatë mbretërore vitin e kaluar njoftoi se fushata ishte ndërprerë pas 15 muajsh, por autoritetet thanë që do të vazhdojë të hetojë gjithashtu punonjësit e “zakonshëm” të qeverisë.
Të dielën në mbrëmje, Komisioni Kombëtar Kundër Korrupsionit tha se kishte arrestuar 298 persona me akuzën e ryshfetit, shpërdorimit të detyrës dhe përvetësimit të afro 101 milion dollarëve.
Arrestimet përfshijnë tetë zyrtarë të Ministrisë së Mbrojtjes të dyshuar për ryshfet dhe pastrim parash në lidhje me kontratat shtetërore nga 2005 deri në 2015, dhe 29 zyrtarë të Ministrisë së Brendshme në provincën lindore.
Dy gjyqtarë, së bashku me nëntë zyrtarë të akuzuar për korrupsion në Universitetin e Almaaref në Riad, u arrestuan për ryshfet.
Arrestimet pasuan një goditje ndaj anëtarëve të familjes mbretërore dhe zyrtarëve të vjetër në fillim të këtij muaji.
Sipas raportimeve, kjo është përpjekja e fundit e Princit të Kurorës për të konsoliduar kontrollin e të gjitha levave kryesore të fuqisë brenda Mbretërisë. /tesheshi.com/
