Marrëveshja bërthamore mes Iranit e fuqive botërore ka qetësuar një pjesë të aktorëve ndërkombëtarë, por ka sjellë trazim në pjesën arabe të globit. Vendet arabe të Gjirit Persik ndjehen të shqetësuara nga një rritje e mundshme e pranisë iraniane, që do të përkthehej në më tepër tension e kokëçarje në një rajon tanimë të paqetë prej kohësh.
Për pasojë, sekretari amerikan i Shtetit, John Kerry, ka planifikuar një vizitë në Katar në javët e ardhshme. Ai do të kërkojë t’i risigurojë vendet arabe të Gjirit Persik se SHBA-të kanë për të punuar bashkë me to për të zmbrapsur ndikimin iranian në rajon, bën me dije gazeta esh-Sharku’l Evsat.
Gazeta citoi fjalët e Kerry-t në një intervistë me të të botuar ditën e sotme, “Kam për të udhëtuar për në Doha në dyjavëshin e ardhshëm, për t’i takuar të tërë.” Me të tërë ai nënkupton zyrtarët e Arabisë Saudite, të Emirateve të Bashkuara Arabe, Bahrejnit, Kuvajtit, Katarit dhe Omanit.
Marrëveshja bërthamore nuk ka qenë e dëshiruar dhe është pritur me skepticizëm nga aleatët rajonalë të SHBA-ve, posaçërisht nga Arabia Saudite, duke parë te Irani nxitësin e konflikteve sektare në Jemen, në Siri dhe në Irak.
Më herët, në maj të këtij viti, udhëheqësit e vendeve të Gjirit Persik u ftuan nga presidenti amerikan në një takim në Kemp Dejvid, në të cilin munguan krerët e Arabisë Saudite dhe të Bahrejnit, në një përpjekje për t’i bindur se marrëveshja do të qe në interes të tyre.
Frika e vendeve arabe nga një ndikim i shtuar i Iranit pas heqjes së sanksioneve dhe çtensionimit të situatës me faktorin ndërkombëtar është tërësisht e arsyeshme, duke patur parasysh se prania iraniane, në suazat shiite, është lehtësisht e perceptueshme në tre vatrat më të nxehta në këtë rajon, në konfliktet e përgjakshme në Siri, në Jemen e në Irak. /tesheshi.com/
