Profesori dhe njohësi i çështjeve të Ballkanit Perëndimor, Daniel Serwer, ka shprehur shqetësim lidhur me deklaratat e Sekretarit amerikan të Mbrojtjes, Pete Hegseth, për luftën në Ukrainë.
Serwer thekson se ndarja e mundshme e Ukrainës, siç është propozuar nga Hegseth, mund të ketë pasoja të rënda për Ballkanin, duke nxitur përpjekje të Serbisë për të marrë territore nga Bosnja dhe Hercegovina, si dhe nga Kosova.
“Trupat amerikane dhe evropiane do të jenë në rrezik”, ka paralajmëruar ai, duke shtuar se një qasje e butë ndaj Rusisë do të dërgonte një sinjal të gabuar për Pekinin, duke vënë në pikëpyetje gatishmërinë e Uashingtonit për të mbrojtur Tajvanin.
“Një pjesë e dëmit mund të jetë shkaktuar tashmë me fjalimin e Hegseth,” ka theksuar Serwer.
Ndërkohë, Emisari i BE-së, Peter Sørensen, ka zhvilluar takime të menjëhershme për të diskutuar hapat e ardhshëm në procesin e dialogut ndërmjet Kosovës dhe Serbisë.
“Dy ditët e fundit në Paris dhe Berlin zhvilluam biseda të thelluara dhe substanciale për të çuar përpara Dialogun. Faleminderit për mbështetjen e plotë të përpjekjeve të mia,” ka shkruar Sørensen në një postim në platformën X. /EuAl/
