Të shtunën në mbrëmje, Papa Françesku udhëhoqi meshën para Krishtlindjes dhe tha, me qëllimin e qartë për të përmendur luftën në Ukrainë dhe konfliktet e tjera, se lakmia dhe uria për pushtet është aq e madhe sa disa “madje duan të gllabërojnë fqinjët e tyre”, raporton Reuters.
Papa Françesku, duke festuar Krishtlindjet e 10-të të pontifikatit të tij, udhëhoqi meshën e mbrëmjes në Bazilikën e Shën Pjetrit. Kjo ishte mesha e parë me stola të plota besimtarësh, afër 7000 prej tyre, pas disa vitesh kufizime për shkak të koronavirusit. 4000 persona të tjerë ishin në sheshin e Shën Pjetrit.
Dinjitet dhe liri
Kreu i Kishës Katolike Romake ka pasur probleme me gjurin muajt e fundit dhe nuk ka mundur të qëndrojë për një kohë të gjatë sonte, ndaj ka deleguar kardinalin që drejtonte festën eukaristike para altarit të kishës më të madhe të krishterimit.
I ulur pranë altarit shumicën e kohës, Papa paralajmëroi kundër lakmisë dhe konsumit në nivele të ndryshme dhe u bëri thirrje njerëzve të shikojnë përtej konsumizmit që ka “paketuar” festën, të gjejnë kuptimin e tij të vërtetë dhe të kujtojnë ata që vuajnë prej luftës dhe varfërisë.
“Burrat dhe gratë e botës sonë, në urinë e tyre për pasuri dhe pushtet, gllabërojnë edhe fqinjët e tyre, vëllezërit dhe motrat e tyre. Sa luftëra kemi parë! Dhe në sa vende, edhe sot, dinjiteti dhe liria njerëzore trajtohet me neveri”, tha Papa.
Fëmijët në rreshtin e parë
Që nga shkurti dhe fillimi i pushtimit rus të Ukrainës, Papa Françesku është shprehur shpesh kundër luftës, duke kritikuar krimet e kryera nga agresioni i paprovokuar. Të shtunën mbrëma, ai nuk e përmendi drejtpërdrejt Ukrainën.
“Si gjithmonë, viktimat kryesore të lakmisë njerëzore janë të dobëtit dhe të pambrojturit”, deklaroi ai dhe hodhi poshtë “një botë të uritur për para, pushtet dhe kënaqësi”.
“Para së gjithash po mendoj për fëmijët që i ka ngrënë lufta, varfëria dhe padrejtësia”, e më tej ka përmendur “fëmijët e palindur, të varfër dhe të harruar”.
Duke krahasuar foshnjën Jezus të lindur në një grazhd dhe varfërinë e sotme, Papa tha: “Në grazhdin e refuzimit dhe të sikletit, Zoti shfaqet. Ai vjen atje sepse aty shohim problemin e njerëzimit tonë: apatinë e krijuar nga raca e uritur për të zotëruar dhe konsumuar”.
Kujtojmë se sipas besimit të krishterë, me bazë Trininë, Zoti është shfaqur në personin e Jezuit, që në Islam njihet si Isa, profet dhe jo bir i Zotit apo më larg akoma, Zot.
Gjithashtu, ndryshe nga narrativa islame ku njeriu paralajmërohet për ditën kur do japë llogari para Zotit, për faktin pra se pas vdekjes e pret tjerë botë, ku mund të përfundojë ose në Xhenet ose në Xhehenem, varësisht se si e ka jetuar jetën e kësaj bote, në aspekt të besimit dhe veprave, në narrativën e krishterë kjo është periferike. /tesheshi.com/
