E gjithë Franca po ndjek me ankth lajmet nga jugu i vendit, ku vijojnë kërkimet për një djalë dy-vjeçar, Emile, i cili u zhduk pa lënë gjurmë nga oborri i shtëpisë së gjyshërve ku po luante.
Deri më tani nuk ka asnjë gjurmë dhe ky rast tashmë shumëkujt i kujton rastin e famshëm, ende të pazgjidhur të Madeleine McCann, e cila u zhduk në Portugali në vitin 2007 dhe për të cilën nuk dihet asgjë për 16 vjet.
800 persona të përfshirë në kërkim
As helikopterët nga ku kumbonte regjistrimi i zërit të nënës së djalit të zhdukur nuk sollën rezultatet e dëshiruara. Punonjës policie, xhandarë, zjarrfikës dhe vullnetarë janë vazhdimisht në kërkim të djalit të vogël.
“Afro 800 njerëz në ditët e fundit janë përpjekur me radhë të gjejnë fëmijën brenda një rrezeje prej pesë kilometrash rreth zonës ku ai është parë për herë të fundit, në Le Vernet. Pavarësisht të gjitha përpjekjeve, ne nuk e kemi gjetur ende fëmijën”, tha Marc Chappuis, prefekt i departamentit Alpes-de-Haute-Provence në Francë.
Të gjitha telefonatat lokale do të analizohen
Shqetësues është fakti se edhe qentë e kërkimit nuk kanë identifikuar asnjë gjurmë, ndaj hetuesit po shqyrtojnë hipoteza të ndryshme: nga fakti që djali humbi diku, e deri tek fakti se u përplas nga një automjet apo e rrëmbyen. Gjithashtu do të analizohen edhe telefonatat lokale.
Në vendin ku jeton djali ka vetëm disa dhjetëra njerëz. Janë kontrolluar 30 objekte, 12 automjete dhe janë marrë në pyetje 25 persona. /tesheshi.com/
