Franca është e vendosur t’i vijojë përpjekjet e saj për një zgjidhje të konfliktit izraelito-palestinez, por nëse ato nuk do të japin rezultat, atëherë ka për të njohur një shtet palestinez.
E ka bërë të ditur këtë ministri i Jashtëm francez, Laurent Fabius, që ka kujtuar se vendi i tij, si një anëtar i përhershëm i Këshillit të Sigurimit të OKB-së, ka përgjegjësinë për të mos i ndalur përpjekjet për të gjetur një zgjidhje mes izraelitëve dhe palestinezëve.
“Franca do të merret në javët e ardhshme me përgatitjet e një konference ndërkombëtare që do t’i bëjë bashkë palët dhe partnerët e tyre kryesorë, amerikanë, europianë dhe arabë, për ta ruajtur dhe për ta bërë të kthehet në realitet zgjidhjen me dy shtete,” ka sqaruar Laurent Fabius.
Përndryshe, sipas kryediplomatit francez, nëse kjo përpjekje dështon, “ne duhet të marrim përgjegjësitë tona, duke njohur shtetin palestinez”.
Fabius ka përshkruar dhe situatën aktuale në territoret palestineze, si dhe sulmin verbal të kryeministrit izraelit ndaj sekretarit të përgjithshëm të OKB-së, “Ne vëmë re se kolonizimi fatkeqësisht vazhdon, e se, së fundi, kryeministri izraelit shkoi gjer atje sa ta akuzojë sekretarin e përgjithshëm të OKB-së për inkurajim të terrorizmit ngase ai solli në vëmendje ilegalitetin e kolonizimit dhe kërkoi që të merrte fund.” /tesheshi.com/
