Nga Mensur Krasniqi
Parisi zyrtar impenjohet fuqishëm në garantimin e marrëveshjes politike në Maqedoni, e ashtuquajtura “Marrëveshje e Perzhinosë”.
Një zyrtar i ministrisë së Jashtme të Francës në Shkup dhe ka takuar dy përfaqësuesit e lartë të aqedonasve dhe shqiptarëve për të kërkuar zbatimin pikë për pikë të paktit që çon vendin në zgjedhje të parakohshme dhe një prokuror special do të hetojë dallaveret e establishmentit të Gruevskit.
Dy aktorët e qeverisjes në Maqedoni ishin dje në ambasadën franceze ku realizuan takim me delegacionin e Ministrisë së Jashtme të Francës të pritur nga Arlem Dezir, sekretar shtetëror për çështje Evropiane.
Ahmeti dhe Dezir, siç thuhet në kumtesën e BDI-së, diskutuan rreth marrëveshjes së Përzhinos, negociatave të grupeve punuese, çështjen e emrit dhe integrimin euroatlantik si dhe marrëdhëniet ndëretnike në vend.
Më tej, thuhet se Ahmeti ka theksuar që Marrëveshja e Përzhinos duhet të zbatohet në tërësi dhe partitë duhet të dëshmojnë përkushtim.
“BDI angazhohet që kjo marrëveshje të ketë sukses sepse kjo do ta përforcojë rrugëtimin tonë Euroatlantik dhe do t’ i përforcojë institucionet e vendit. Asnjë nga partitë politike nuk guxon që të rezikojë perspektivën euroatlantike”, ka thënë Ahmeti.
Ndërkaq, Dezir theksoi që Ahmeti dhe BDI-ja kanë luajtur rol të rëndësishëm në vend dhe theksoi që Franca do të vijojë mbështetjen për Maqedoninë, por kërkoi zbatim të përpiktë të Marrëveshjes së Përzhinos.
Lidhur me marrëdhëniet ndëretnike, Ahmeti ka folur për dallimet me partitë maqedonase në lidhje me zbatimin zyrtar të gjuhës shqipe si dhe për zbatimin e Marrëveshjes së Ohrit, siç thotë, në frymë dhe germë.
Nga ana tjetër siç kumtoi zyra e shtypit e qeverisë, bashkëbiseduesit ishin përqëndruar në disa tema aktuale nga sfera e politikës, marrëdhëniet mes dy shteteve, mundësitë për avancimin dhe pasurimin e tyre, si dhe për temën me integrimet evropiane të shtetit.
Këta dy dhanë vlerësim pozitiv për marrëdhëniet e ndërsjellta, të cilat, theksuan se janë me potencial për zhvillim shtesë, si dhe në sferën e diplomacisë, ashtu edhe në sferën e ekonomisë.
Kryeministri Gruevski falënderoi për përkrahjen parimore të cilën Republika e Francës ia jep Maqedonisë në integrimet e saj evropiane, të cilat paraqesin qëllim strategjik të shtetit në realizimin e të cilave aktualisht po punohet përmes plotësimit të më shumë masave dhe reformave.
Bashkëbiseduesit u përqëndruan edhe në temën me migrantët ilegalë, me ç’rast u pajtuan se nevojitet bashkëpunim i përbashkët dhe i koordinuar në këtë kontekst më të gjërë, e në drejtim të shqyrtimit të zgjidhjeve dhe marrjen e vendimeve dhe masave të cilat do të jenë në drejtim të tejkalimit të situatave aktuale.
Përveç tjerash, të dy palët e theksuan gatishmërinë për bashkëpunim për projekte në sfera të ndryshme, të cilat do ta dinamizojnë bashkëpunimin ekonomik, këmbimin tregtar dhe bashkëpunim në fushën investitive.
/tesheshi.com/
