Qëllimi i Donald Trump në propozimin e një ndalimi të hyrjes së të gjithë emigrantëve muslimanë në Shtetet e Bashkuara synonte të tërhiqte vëmendje e pati një sukses trullosës. Por linja e tij e të menduarit, që sugjeron se të gjithë ndjekësit e islamit përbëjnë një kërcënim të mundshëm për sigurinë kombëtare, nuk është e re. Në fakt, është pjesë e një lëvizjeje të themeluar prej vitesh nga disa nga kompanitë e fondacionet filantropike konservatore më të mëdha në vend.
Në njoftimin e propozimit për ndalimin e përkohshëm të gjithë emigracionit musliman në Shtetet e Bashkuara, Trump citoi punën e qendrës për politikat e sigurisë, një kompani me seli në Uashington e drejtuar nga ish-zyrtari i mbrojtjes në administratën e Reganit, Frank Gaffney, që promovon pikëpamje agresive të politikës së jashtme, sidomos në Lindjen e Mesme, që mbron nivele më të larta të shpenzimeve për mbrojtjen dhe paralajmëroi për infiltrimin në qeverinë amerikane të elementëve të Vëllazërisë Muslimane.
“Më së fundmi, një sondazh nga qendra për politikat e sigurisë publikoi të dhëna që tregojnë se 25 për qind e muslimanëve amerikane bien dakord se dhuna kundër amerikanëve këtu në Shtetet e Bashkuara justifikohet si pjesë e një xhihadi global dhe 51 për qind bien dakord, që muslimanët në Amerikë duhet të kenë të drejtë të zgjedhin për t’u qeverisur me ligjin Islamik”, lexohet në deklaratën për shtyp të fushatës së Trump. Por, ai sondazh dhe metodat e përdorura janë shumë larg të qënit shkencore. Sondazhi ishte një vëzhgim online me rreth 600 muslimanë, një fakt që u mbajt i fshehur derisa u publikua nga një kompani tjetër sondazhesh.
Metodologjia e përdorur është vërtet e dyshimtë. Organizata që vendos standardet në industrinë e sondazheve thotë se kompania e sondimit nuk e ka idenë se kush po i përgjigjet pyetjes,” që do të thotë se mund të përgjigjet kushdo.
Frank Gaffney ka një histori të gjatë të nxitjes së pikëpamjeve ekstremiste anti-muslimane dhe të teorive konspirative rreth presidentit Barak Obama.
Në vitin 2008, në një artikull në “The Washington Post”, Gaffney ngrinte pyetjen nëse presidenti është një qytetar natyral amerikan, lindur në Shtetet e Bashkuara që është kërkesë e panegociueshme e kushtetutës” dhe duke iu përgjigjur pyetjes së vet, thoshte se “ka prova që Obama është lindur në Kenia, e jo si pretendon, në ishujt Havaj”.
Ai gjithashtu herë pas here sugjeronte se ndihmësja e Hillary Clinton, Huma Abedin ishte operative e Vëllazërisë Muslimane.
Ashtu si edhe Trump, Gaffney tregon shumë pak interes për liritë fetare apo personale të muslimanëve. Gafnney ka deklaruar se muslimanët që ndjekin sharian duhet të ndiqen penalisht për rebelim. Ai gjithashtu e ka përshkruar qendrën e komunitetit islamik në Manhatan si “xhamia e Kalit të Trojës”.
Deklaratat dhe qëndrimet e tij janë kritikuar dhe ndaj tyre është mbajtur qëndrim nga figura të larta publike dhe të shoqërisë civile në Shtetet e Bashkuara. Deri në fitoren e Trump, Gafnney nuk pranohej nga mjedisi politik, por kjo nuk e ka ngadalësuar aftësinë e tij për të mbledhur shuma të mëdha parash. Kompania e tij CSP mblodhi 3.55 milionë dollarë në vitin 2013 dhe 2.04 milionë dollarë në vitin 2014.
Lista e financuesve më të besueshëm të Gaffney paraqet disa surpriza. Sipas të dhënave, ai merr financime nga fondacione konservatore që njihen për historinë e tyre në mbështetje të islamofobisë. Financuesit e tij përfshijnë gjithashtu edhe kompani si Boeing, General Dynamics, Lockheed Martin apo General Electric.
Gaffney mund të jetë bërë konfidencial me Trump kur grupi i tij mbështeti një tubim të Trump dhe Cruz që kundërshtonte marrëveshjen bërthamore me Iranin. Por, edhe më parë, Gafnney e kishte përqafuar mesazhin ndarës të Trump për emigrantët.
Kështu, mes apeleve të Trump për regjistrimin kombëtar të muslimanëve dhe ndalimit të emigracionit musliman, duket se për shkak të ndonjë koinçidence apo bashkëpunimit të drejtpërdrejtë, Trump po ndërton një kuadër politik anti-emigrantëve e anti-muslimanëve, që pasqyron deklaratat dhe propozimet e mbrojtura nga Frank Gaffney dhe qendra e tij për politika të sigurisë.
Përgatiti: Juli Prifti – /tesheshi.com/
