Kur një fotografi bën revolucion në ekzistencën e një njeriu. Poonam ështënjë vajzë indiane, e cila u fotografua nga fotoreporteri italian Alex Masi. Fotografia është bërë në vitin 2009, ku tregohet vajza, e cila në atë kohë ishte vetëm 7 vjeçe dhe rrinte nën shiun që lagte qytetin Bhopal.
Siç ka treguar fotografi në Indipendent, shkrepja, e cila ndryshoi jetën e vogëlushes është realizuar në 24 gusht të vitit 2009 në Bhopal, ku Masi ndodhej për të raportuar rreziqet në shëndetin e fëmijëve për shkak të kontaminimit të ujit si pasojë e shkarkimeve të produkteve industriale të kompanisë Union Carbide India Limited, shoqëri e lidhur me Union Carbide.
“Më 25 gusht, gjatë një prej vizitave të mia në këtë zonë, nisi shiu. Poonam, motra e një prej fëmijëve të sëmurë ishte duke u freskuar përpara shtëpisë së saj. Në atë moment nisa ta fotografoj”,- tregon Alex.
Vajza konsiderohej nga banorët e fshatit si ndjellëse e fatit të keq pasi kishte gjashtë gishta në këmbën e majtë dhe pas lindjes së saj i ati kishte humbur punën. Në atë fotografi ajo shfaqet e lumtur, duke parë qiellin dhe tërësisht e lirë.
Në vitin 2011 fotografia fitoi çmimin e parë në Photographers Giving Back Photo Aëard. Bëhet fjalë për një çmim të krijuar me qëllimin për të ndihmuar personat e fotografuar në kushte të vështira jetese. Çmimi konsistonte në dhënien e një shume prej 5 mijë dollarësh, që Masi i ka përdorur në ndryshimin e jetës së Poonam dhe të familjes së saj.
“Me ndërhyrjen tonë, tani ata kanë një shtëpi të re me tulla, një tualet dhe një dyqan që babai i saj, Sureshi, e përdor për të shitur perime, nga e cila fiton shumë më shumë se çdo punëtor në sektorin e ndërtimit apo në sektore të tjera punësimi”,- ka treguar fotoreporteri.
Por gjithçka nuk mbaron me kaq. Masi ka vendosur të hapë një fond për të financuar studimet e vajzës, e cila tani është 13 vjeçe dhe për ta ndihmuar që të vazhdojë shkollën./tesheshi.com/
