Fshati Predappio i rajonit të Emilia Romagna-s në Itali, tre herë në vit mbushet plot për plot nga nostalgjikët e Il Duce-s apo Benito Mussolinit.
Shumica janë përgjithësisht të rinj që bëjnë selfie para tryezës ku ka punuar diktatori fashist, që ende ka pasues.
Paguajnë 10 euro për të hyrë në muzeun privat që adminisrohet nga familjarë të Mussolini-t, ndërkohë që në të gjithë qytetin, biznesi i relikeve të fashizmit ecën me ritme të shtuara.
Gota, kapele, shami, shalle, filxhanë, thika, postera e libra me Beniton thahen nga “fashistat” e rinj, por ka edhe më.
Nëse “shpon” portofolin, atëherë mund të të mbajë një omeli Pater Tam, një prift i zonës, apo mund të hash një drekë në shtëpinë e il Duce-s, ku preferohet menuja verore me në qendër tagliatelle-t me mish.
Pyetja është se çfarë është e gjithë kjo zallamahi, politikë apo folklor?
Fakt është, se nostalgjikët e Mussolinit janë ekstremistë të zellshëm dhe racistë. Urrejnë emigrantët, muslimanët, gratë, urrejnë gjithçka.
Thonë se duan Italinë dhe atdheun. Ngrenë dorën lart, salutojnë alla romana dhe përsërisin frazat që i përdorin në stadiume apo mbledhje të ekstremistëve.
Ndërkohë, sa dalin nga muzeu, mbushin çantat me dhurata që kanë gjitkund foton e njeriut që lindi në vitin 1883 në një shtëpi të vjetër e të varfër, por që tashmë është restauruar dhe duket një pallat.
/tesheshi.com/
