Nga Donat Maloku
Kuvendi i Kosovës me 82 vota të deputetëve, pas një debati maratonik dhe përplasjeve pozitë-opozitë ka miratuar ndryshimet kushtetuese që do t’i hapin rrugë themelimit të Gjykatës Speciale.
Opozita gjatë gjithë debatit vlerësojë se me votimin e sërishëm shkelet Kushtetuta e vendit, rrënohet kredibiliteti i Kuvendit të Kosovës dhe kjo gjë do t’i kushtojë shumë vendit tonë. Analistët politikë vlerësojnë se historia do të tregojë nëse themelimi i kësaj Gjykate ka qenë apo jo e drejtë.
Kurse, sa i përket asaj se a është shkelur Kushtetuta e vendit, njohësit e politikës kanë mendime të ndryshme.
Analisti, Fatmir Sheholli, ka deklaruar për portalin “Te Sheshi”, se votimi i amendamenteve që hapin rrugën për formimin e Gjykatës Speciale nuk ishte kurrfarë befasie politike.
“Nëse i referohemi fjalimit të krerëve institucional të Republikës së Kosovës (kryeministrit, zv.kryeministrit dhe kryetarit të Parlamentit) atëherë është e qartë se barra për çfarëdo qoftë në të ardhmen bie mbi supet e tyre. Historia do të tregojë a ka qenë veprim i duhur apo nuk ka qenë. Sa i përket çështjes së asaj se a është shkelur Kushtetuta, konsideroj që Gjykata Kushtetuese e ka dhënë vendimin e saj kur herën e parë kryetari i Kuvendit i është drejtuar këtij institucioni të shtetit të Kosovës dhe vendimi ka qenë se nuk shkelet Kushtetuta. Çfarëdo opinioni tjetër rreth kësaj çështjeje i atyre që nuk kanë njohuri të mjaftueshme juridike besoj që nuk çon peshë.
Konsideroj që kjo është fitore e aleatëve tanë amerikanq ndaj atyre që nuk ja dëshirojnë të mirën shtetit të Kosovës”, është shprehur Sheholli.
Njohësi i mirë i zhvillimev politike, Faik Krasniqi, thotë se populli dhe shteti i Kosovës asgjë nuk do të përfitojë nga kjo Gjykatë, por vetëm do të humbim edhe 10 vite kohë.
“Prandaj shqiptarët po tregohen naivë duke menduar që Gjykata Speciale do t’i largojë kriminelët nga skena politike, por e kanë gabim, sepse kjo Gjykatë do të merret vetëm me krime lufte! E ky popull që jeton me ëndrra syçelë, vazhdon ta gënjejnë dhe t’i krijojë iluzione vetes, se kjo Gjykatë do ta pastrojë Kosovën nga këta kriminelë e banditë, të veshtur me petkun e politikanit!
Padyshim që Kushtetuta e Kosovës është shkelur me të dyja këmbët! Por çmenduria dhe idiotizmi tjetër i deputetëve tanë, ishte mosvotimi për gjenocidin e Serbisë të ushtruar ndaj popullatës civile shqiptare në Kosovë, ku 55 deputetë votuan kundër kësaj resolute”, ka deklaruar Krasniqi për portalin “Te Sheshi”.
Albinot Maloku, analist politik, në një prononcim për portalin “Te Sheshi”, se amendamentet kushtetuese që u votuan nga ana e Kuvendit të Kosovës, pas një presioni të fuqishëm, nuk janë veçse hapi i parë drejt shkërmoqjes së mënyrës së funksionimit kushtetues e shtetëror të Republikës së Kosovës.
“Gjykata Speciale është tanimë kategori kushtetuese në vend. Në momentin që është iniciuar Gjykata Speciale, Republika e Kosovës është prezantuar si shtet që ka dështuar me sistemin e drejtësisë, kurse me themelimin e tanishëm të saj, kam frikë se lajm kryesor do të jetë po kjo Gjykatë. Nuk flas për imazh, por për funksionim të sistemit të mirëfilltë të gjyqësorit dhe drejtësisë vendore që është dashur të jetë, sidomos prej pavarësisë së vendit. Gjithsesi, turpi i bie edhe Tribunalit Ndërkombëtar për Ish-Jugosllavinë, gjyqësorit të UNMIK-ut e edhe misionit evropian për drejtësi në Kosovë, EULEX.
Nëse flasim për atë se çka ka fituar shteti i Kosovës me Gjykatën Speciale, mund të them se, nëse është i sinqertë mendimi se me të do të fillojë zhvillimi ekonomik dhe njohjet, atëherë kjo është për keqardhje për të mos thënë çmenduri. Askush nuk do të krenohet me Gjykatën Speciale”, ka deklaruar Maloku.
Ndryshe, Gjykata Speciale, apo siç do të emërohet me ligj si Dhomat e Specializuara dhe Zyra e Prokurorit të Specializuar, pretendon të hetojë supozimet në raportin e Këshillit të Evropës lidhur me dyshimet për krime lufte të disa ish-pjesëtarëve të Ushtrisë Çlirimtare të Kosovës, ndaj disa civilëve serbë gjatë luftës së fundit.
(tesheshi.com)
