Ndihmës- sekretarja Amerikane e Shtetit, Victoria Nuland do të vizitojë sot Maqedoninë në kuadër të turnit Ballkanik, ndërkohë akoma pa ardhur, bëri me dije se cili është qëllimi i zbarkimit të diplomacisë amerikane në Shkup.
Duke folur në forumin e Dubrovnikut një ditë më herët, ajo apeloi që liderët politik në Maqedoni të zbatojnë marrëveshjen e arritur me Komisionerin e BE-së, Johannes Hahn, lidhur me normalizimin e situatës politike ndërsa kërkoi edhe zgjidhje të problemit me emrin.
“Porosia jonë është e fuqishme. Para vetes keni anëtarsimin në NATO dhe BE”, tha mes tjerash Nuland.
Ndërkohë analistët duke komentuar vizitën e zyrtares së lartë amerikane, për portalin tesheshi.com thonë se realizohet për t’i dhënë shtytje procesit për kapërcimin e ngërçit politik, por vizita ka edhe aspektin e ‘marrjes në llogari’.
Siç thotë Ramadan Ramadani, analist nga Instituti “Nisma” pritjet janë të mëdha, por vetëm nga ana e qytetarëve, të cilët kanë mbetur mes opozitës së pafuqishme dhe pozitës pa ide, ndërsa për vetë vizitën shprehet se vjen pas asaj të para një viti, atëherë kur Nuland vendoi në pah mes tjerash dhe jo-proporcionalitetin në investime dhe zhvillim ekonomik të rajoneve shqiptare në Maqedoni:
“Zakonisht këto vizita të rangut të lartë janë kumulative në aspektin e bilancit, sipas thënies: “ku e lam e ku na mbeti”.
Ashtu që nuk di se me çfarë fytyre do ta presin zonjën Nuland, politikanët e njëjtë të cilëve vjet ajo ua përmendë këtë padrejtësi. Sidomos pasi ka informata se disa investitorë nga SHBA që kanë ardhur pas asaj vizite, janë “vjedhur” nga zona ekonomike e lirë në Tetovë, për në rajone tjera në Maqedoni nga e njëjta qeveri”, deklaroi Ramadani.
Për analistin Xhelal Neziri, vizita e ndihmës sekretares të shtetit amerikan në rajon tregon për një rikthim të interesit amerikan për Ballkanin, sidomos pas refuzimit të Gjykatës Speciale në Kosovë dhe të përshkallëzimit të krizës në Maqedoni:
“Sa i përket vendit, mendoj se interes i SHBA-ve është rikthimi i besimit në institucione me atë që hapi i parë do të ishte mbajtja e zgjedhjeve të lira, të rregullta, korrekte dhe demokratike. Kjo do të përbënte një paradhomë për departizimin e institucioneve, reformimin apo dekontaminimin e gjyqësisë nga viruset partiake, funksionimin e shtetit ligjor në drejtim të ndëshkimit të të gjithë funksionarëve të korruptuar dhe konfiskimin e pasurisë së politikanëve që e kanë bërë duke keqpërdorur pozitat publike dhe paratë e qytetarëve” tha Neziri.
Pas vizitës së Nuland, të martën në Shkup to qëndrojë Hahn me qëllim të përshpejtimit e marveshjes eventuale politike, dhe nëse këto dy vizita rezultojnë të dështuara nuk përjashtohet mundësia që Brukseli zyrtar të emërojë përfaqësues special për zhvillimet në Maqedoni, ndërsa emri më i përfolur është ai i shefes së diplomacisë evropiane Frederika Mogerini.
Përgatiti: Bekim Laçi /tesheshi.com/
