Nga Donat Maloku
Me të kaluar Gjykata Speciale në Kuvendin e Kosovës, në opinion filluan të dalin emrat e të akuzuarve të mundshëm. Në listat e publikuara deri më tani, thuhet se të akuzuar do të jenë zyrtarë të lartë shtetërorë si ish-kryeministri Hashim Thaçi, kryekuvendari Kadri Veseli, nënkryetari i Kuvendit Xhavit Haliti, ish-komandanti i UÇK-së dhe deputeti Azem Syla, ish-anëtar i Shtabit të Përgjithshëm të UÇK-së, njëherit deputeti Fatmir Limaj, deputeti i AAK-së Daut Haradinaj, deputeti i Lëvizjes “Vetëvendosje” Rexhep Selimi, deputeti i pavarur Shaip Muja, si dhe ish-komandantë të rangut të lartë, kryesisht nga zona e Drenicës.
Aktakuzat e para pritet të ngrihen qysh në janar të vitit të ardhshëm, në të cilin vit kreu i PDK-së Hashim Thaçi do të tentojë të bëhet president i Kosovës, pasi ashtu e parasheh marrëveshja e koalicionit PDK-LDK.
Por, skena politike kosovare mund të pësojë një ‘tronditje’ të madhe pasi 2016-ta dhe vitet pas pritet të jenë vit të përcaktimit të karrierës politike të shumë politikanëve të lartë të cilët pritet të përballen me Specialen.
Deputetë të Kuvendit dhe njohës të rrethanave politike thonë se në momentin që ngrihen aktakuzat e para ndaj zyrtarëve të lartë të shtetit, Kosova do të jetë në qendër të vëmendjes ndërkombëtare. Sipas tyre karriera politike e politikanëve që do të akuzohen nga Specialja do të dëmtohet rëndë, por thonë se kjo gjykatë nuk do të merret me njerëzit që kanë abuzuar me buxhetin e shtetit.
Adem Salihaj, deputet i LDK-së ka thënë për portalin “Te Sheshi”, se Kosova për disa vite do të jetë në fokus të opinionit ndërkombëtar, ndërsa Gjykata Speciale do të jetë një lloj ‘teatri’, në skenën e së cilës do të defilojnë prokurorë e gjykatës ndërkombëtarë dhe figura të larta politike.
“Megjithatë, nëse ndodhë vërtet kjo që po thuhet, se do të gjykohen edhe këta kryekriminelët, atëherë kjo gjykatë do ta ketë anën e mirë për situatën e brendshme të Kosovës, sepse do ta pastrojë Kosovën nga gjithë ky llum e mbeturina kriminale që e kanë kapluar atë. Kjo gjykatë mund të bëhet një shans i madh për Kosovën që ta heq qafa e saj litarin i cili e ka ngulfatur në tërësi. Por,qytetarët e Kosovës duhet të jenë të vetëdijshëm se asnjë luftë nuk mund ta fitojë askush vet, nëse ata nuk e ngrisin vetëdijen dhe se luftojnë edhe vet krimin me të gjitha mjetet që kanë. Në Kosovë duhet të krijohet një vetëdije e re shtetformuese, një vetëdije e re për vlerat e lirisë dhe të demokracisë,një vetëdije e re patriotike mbi vlerat e mëdha të shtetit. Është koha të bëhet kthesa në Kosovë”, ka deklaruar deputeti Salihaj.
Analisti politik, Blerim Burjani, thotë se Gjykata Speciale bazuar në ligjin për dhomat e veçanta dhe raportin e Dick Martit pritet ndjekja e personave të dyshuara për trafikim por jo edhe vepra tjera penale. Ai në një prononcim për portalin “Te Sheshi”, thotë se pak ka shpresë që kjo gjykatë të bëjë pastrimin e skenës politike në Kosovë, duke thënë se kjo gjykatë nuk trajton vepra penale të karakterit të korrupsionit, keqpërdorimit dhe shpërdorimit të detyres zyrtare të cilat i kanë bërë jashtëzakonisht dëme edhe buxhetiti të shtetit.
“Nuk do të ketë sipas të gjitha gjasave akuzë kundër Hashim Thaçit, i cili ishte përfaqesues politik i krahut të luftës. Ai mund të ftohet në cilësinë e dëshmitarit por jo si i akuzuar. Kuptohet se kjo çështje nuk mund të paragjykohet, është temë e prokurorisë së Speciales, kjo mbetet pyetje hipotetike sikurse edhe shumë tema tjera hipotetike dhe lista që dalin kot në opinion nga disa individë. Unë nuk besoj që kjo gjykatë bazuar në kompetencat aktuale do të merret me temën e pastrimit nga njerëzit abuzues të buxhetit dhe keqërdoruesit”, ka deklaruar Burjani.
Politologu Nexhmedin Spahiu, në një prononcim për portalin “Te Sheshi”, ka pohuar se nëse ngriten aktakuza ndaj zyrtarëve të lartë politikë, karriera politike e tyre do të dëmtohet rëndë.
“Së pari të gjithë ata që do të akuzohen nga Tribunali special nuk është e thënë të dalin të pafajshëm. Disa edhe mund të dalin të pafajshëm si Ramushi e Fatmiri në Hagë, por nëse akuzohen karriera e tyre politike do t’u dëmtohet së tepërmi. Nëse ta zëmë nuk do ta akuzonte Ramushin Haga ai tani akoma do t’ishte kryeministër në mandatin e tij të tretë a të katërt. Tani sado që doli i pafajshëm nuk arriti të kthehet në atë pozitë”, ka deklaruar Spahiu.
Njohësi i rrethanave politike, Kushtrim Gashi, thotë se pavarësisht se në opinion po flitet dhe diskutohet për një listë emrash që janë edhe drejtues të institucioneve të vendit, mbetet të shihet se a do të akuzohen vërtetë apo jo. Gashi ka deklaruar për portalin “Te Sheshi”, ka thënë se në rast se ndodh që udhëheqësit e institucioneve të vendit të akuzohen nga Specialja, atëherë do të tronditet e gjithë skena politike në vend dhe rrjedhimisht do të fuqizohen partitë politike që nuk ishin pjesë e luftës, përkatësisht LDK-ja dhe VV-ja.
“E keqja e madhe e gjithë kësaj do të jetë kur drejtuesit politik të UCK-së dhe komandantet e saj të akuzohen nga Specialja dhe do të jenë përball sfidës me të rëndë, rivalet e tyre politik do të bëjnë festë në kurriz të fatkeqësisë së tyre. Nëse dikush vërtetë mendon që skena politike do të pastrohet me ngritjen e aktakuzave ndaj ish krerëve të UÇK-së, atëherë do të gabonte plotësisht sepse ata po gjykohen për luftën që na solli lirinë e jo për pasluftën”, thotë Gashi, duke shtuar se Specialja do të duhej të merrej edhe me kriminalitetin ekonomik siç e quan ai ‘kanceri i shoqërisë’. /tesheshi.com/
