Provat zyrtare të Çmimit të Madh të Japonisë, të zhvilluara këtë mëngjes, janë mbyllur me triumfin e Nico Rosberg-ut, që do të niset nesër i pari në garë.
Kryesuesi i botërorit të Formulës 1 ia doli të lërë pas rivalin e tij për titull, Lewis Hamilton-in, që vetëm për 0.013 sekonda më shumë do të jetë i dytë në radhën e nisjes.
Në pistën e Suzukës, në një prej më të vështirave në garat e Formulës 1, pas dy pilotëve të Mercedes-it erdhën ata të Ferrari-t, përkatësisht Raikkonen e Vettel. Veçse gjermani do të spostohet në vendin e shtatë për shkak të një dënimi me tre vende.
Verstappen e Ricciardo të Red Bull-it erdhën në finishin e provave i pesti dhe i gjashti.
Kështu, dhjetëshja e parë në nisje do të jetë kjo: Rosberg, Hamilton, Raikkonen, Verstappen, Ricciardo, Perez, Vetel, Grosjean, Hulkenberg e Gutierrez.
Kjo është gara e pestë nga fundi e këtij botërori, e me orën tonë nis nesër në 07:00.
Kampionati kryesohet nga Rosberg, me 288 pikë, i pasuar nga Hamilton me 265 pikë.
Gjermani synon fitimin për herë të parë të titullit kampion bote në Formula 1. /tesheshi.com/
