Kërcënimi ndaj ministrit të Brendshëm Saimir Tahiri pavarësisht se me një mesazh telefonik, është marrë seriozisht nga organi i akuzës. Familjes Tahiri i është dhënë një mbrojtje e menjëhershme.
Urdhri i Prokurorisë ka autorizuar forcat speciale RENEA të ruajnë banesën e ministrit të Brendshëm. Në këtë angazhim të forcave elitë të policisë shqiptare është futur edhe banesa e të atit, i cili ishte i sulmuari i pari në këtë çështje.
Në procedurë nga Prokoruria e Përgjithshme ka nisur edhe dhënia e statusit të të mbrojturit, çka do të nënkuptojë, se mbrojtja ndaj ministrit dhe familjes së tij do të jetë për një kohë të pacaktuar, për vite me rradhë, edhe nëse Saimir Tahiri do të përfundojë detyrën si ministër i Brendshëm.
Statusi sipas prokurorisë do të jepet pasi ka dyshime të forta se kërcënimet ndaj familjes Tahiri janë tepër serioze. Zanafilla nis me tritolin e vendosur në farmacinë e të atit, për të cilën me vone u akuzua familja Gjuta.
Policia arrestoi në kohë të shpejtë shtatë persona nga kjo familje, ndërkohë që është shpallur në kërkim vladimir Gjuta, personi i konsideruar si ideatori i atentatit ndaj biznesit familjar të familjes Tahiri. Gjatë kësaj periudhe policia ka bërë disa herë kontrolle për kapjen e këtij të fundit por pa rezultat.
