E mërkura ka shënuar një tjetër hap historik në përpjekjet e palestinezëve për njohje. Pasi presidenti i Autoritetit Palestinez, Mahmud Abbas, mbajti një fjalë para Asamblesë së Përgjithshme të Kombeve të Bashkuara, flamuri palestinez u ngrit për herë të parë gjatë një ceremonie formale në selinë qendrore të OKB-së në Nju Jork.
Në ceremoninë e ngritjes së flamurit qenë të pranishëm mes të tjerëve dhe sekretari i përgjithshëm i OKB-së, Ban Ki-Moon, kryeministri turk, Ahmet Davutogllu, dhe ministri i Jashtëm francez, Laurent Fabius.
Mahmud Abbasi e përshkroi ngritjen e flamurit si një moment historik në luftën e popullit palestinez për liri dhe pavarësisë.
“Ngriheni shumë lart flamurin e Palestinës. Sepse ai është simbol i identitetit tonë,” qenë fjalët më spikatëse të tij.
Ndërsa sekretari i përgjithshëm i OKB-së, duke folur gjatë ceremonisë, do të vinte në pah rolin e organizmit që ai drejton, “Ajo (ngritja e flamurit) simbolizon angazhimin e kahershëm të Kombeve të Bashkuara për t’i mbështetur aspiratat palestineze.”
Gati tre javë më parë, më 10 shtator, Asambleja e Përgjithshme e OKB-së do të miratonte një rezolutë që i lejonte shtetet vëzhguese joanëtare t’i ngrinin flamujt e tyre në selinë e OKB-së përkrah atyre të shteteve anëtare. Përfitues të parë të kësaj të drejte u bënë Palestina dhe Vatikani. /tesheshi.com/
