Kancelarja gjermane, Angela Merkel ka përqafuar për herë të parë kërkesën e partisë së saj për ndalimin e pjesshëm të burkës dhe hixhabit në Gjermani, duke u thënë delegatëve në konferencën e kristian-demokratëve në Essen: “mbulimi i plotë i fytyrës është i papërshtatshëm dhe duhet ndaluar kudo që është ligjërisht e mundshme”.
Kancelarja gjermane nga CDU pritet që këtë javë të kalojë për miratim një mocion që propozon ndalimin e mbulimit të plotë të fytyrës në disa fusha të jetës publike, si në gjykata, shkolla dhe universitete, sikundër edhe gjatë ndalimit nga policia rrugore apo kontrolli policor. Ndalimi i plotë i mbulimit të fytyrës, ashtu siç u miratua dhe në Francë në vitin 2011, shihet si i përputhshëm me ligjet themelore gjermane.
Derisa të dalin detaje të propozimit, komentet e Merkel përfaqësojnë një ndryshim në retorikë sesa një kthim të plotë pas: shtatorin e kaluar, kancelarja bëri thirrje për rregullore më strikte në rastet kur nuk lejohet mbulimi i plotë i fytyrës nga gratë muslimane, ndërkohë që vinte në dukje se “të jetuarit e diversitetit është pasojë logjike e lirisë”.
Në adresimin e saj të parë partiak që pas njoftimit se do të rikandidonte për mandatin e katërt si kancelare, vitin e ardhshëm, Merkel u fokusua në çështje të rendit e ligjit, të garantuara që ndezin bazën konservatore të partisë.
“Ligji ynë merr përparësi ndaj kodeve të nderit, atyre tribale apo rregullave familjare, apo edhe ndaj ligjit të sharias – e kjo duhet artikuluar qartë”, tha Merkel.
Pas fjalimit të mbajtur, 89.5 për qind e delegatëve të CDU e zgjodhën atë sërish si lideren e partisë, mbështetja më e ulët që ajo ka pasur gjatë kohës që ka qenë kancelare. Ashtu si dhe në vitet e shkuara, kandidatura e saj kaloi pa kundërshtime.
Vendimi i Merkelit për të mbajtur të hapura kufijtë teksa me mijëra refugjatë ishin bllokuar në Hungari shtatorin e kaluar, ka sjellë pasoja; jo vetëm jashtë partisë, por edhe nga ana e partisë simotër bavareze, CSU. Por gjatë fjalimit 80-minutësh Merkel theksoi se “një situatë si ajo e verës 2015, nuk mund, nuk duhet dhe nuk do të përsëritet”.
Duke këmbëngulur se Gjermania kishte të drejtë kur u dha strehim njerëzve që largoheshin nga zonat e luftës në Siri, Merkel tha gjithashtu se shumë azilkërkues do të duhet të lënë Gjermaninë në të ardhmen, duke u zotuar të përshpejtojë deportimin e atyre që u është refuzuar azili. Ajo tha: “Jo të gjithë ata që kanë mbërritur këtu, mund të qëndrojnë”.
Merkel dënoi Rusinë dhe Iranin për mbështetjen që japin për Bashar al-Assad dhe që nuk ndalojnë bombardimin në Halep. “Eshtë fatkeqësi që nuk kemi qenë në gjendje të ndërtojmë korridore ndihmash. Duhet të vazhdojmë të përpiqemi”.
Ajo shprehu frustrimin e saj nga mungesa e zemërimit publik për situatën humanitare në Siri, duke thënë: “Për të qenë të sinqertë, nëse një marrëveshje e tregtisë së lirë me SHBA mund të nxjerrë me dhjetëra mijë njerëz në rrugë, si mund që bombardimet barbare mbi Halep të mos nxisin protestën e publikut? Kjo tregon se diçka nuk shkon me standardet tona politike”.
Viti 2016 sipas kancelares, e ka bërë botën më të pasigurtë dhe të paqëndrueshme. “Kur bota kthehet përmbys, ne duhet së pari të bëjmë çdo gjë që Europa të mos dalë më e dobët nga sa hyri, në gjithë këtë situatë aktuale”, tha ajo.
Përgatiti: Juli Prifti – /tesheshi.com/
