Angela Merkel fitoi zgjedhjet në Gjermani, duke siguruar mandatin e 4ßtë si kancelare, pavarësisht se do t´i duhet të udhëheqë një koalicion për të formuar qeverinë e re. Socialdemokratët e Martin Schutz deklaruan se do të jenë opozita e ardhshme, duke shmangur në këtë mënyrë mundësinë e krijimit të një koalicioni të gjerë me unionin CDU/CSU të kancelares Angela Merkel.
Po çfarë do të thotë për shqiptarët fitorja e Merkelit?
Ambasadorja gjermane në Tiranë, Suzane Schutz, duke iu përgjigjur interesimit të mediave, thotë se fitorja e Angela Merkel do të thotë një vijim i marrëdhënieve të mira Shqipëri- Gjermani dhe mbështjetje e plotë e integrimit të Ballkanit në BE.
“Sa i përket politikës së jashtme dhe asaj evropiane të Gjermanisë unë në të ardhmen nuk pres zhvendosje. Të gjitha partitë në Gjermani janë në të njëjtin zë, ato janë për anëtarësim të vendeve të Ballkanit në Evropë, sikurse edhe të Shqipërisë”, tha Schutz.
Në këto zgjedhje partia e tretë parlamentare do të jetë AfD, por për diplomaten gjermane në Tiranë, pavarësisht se ajo do të jetë një fraksion i konsiderueshëm në Bundestag, nuk do të mund të ndikojë në politikat e qeverisë federale sa i përket Ballkanit Perëndimor dhe Shqipërisë. /tesheshi.com/
