Mbi 5.000 luftëtarë të opozitës siriane kanë nisur sot një operacion për të çarë rrethimin në Halep.
Operacioni i quajtur “Lufta e Madhe” ka nisur me goditjen me raketa të bazës ajrore të Neirabit. Kryengritësit po përparojnë drejt qendrës së qytetit nga rrethinat jugperëndimore dhe nga rajoni Dahijjatul Esed.
Burimet nga terreni bëjnë me dije për përplasje të ashpra, me pjesë të qytetit që më herët ishin larg luftimeve e që tani janë kthyer në vijë fronti.
Banorët në lindje të Halepit dogjën goma në rrugë për ta bërë të pamundur dallimin e kryengritësve nga ajri.
“Ka një thirrje të përgjithshme për çdokënd që mund të mbajë armë,” i tha Reuters-it një prej drejtuesve të kryengritësve të Frontit të Levantit, që lufton nën flamurin e Ushtrisë së Lirë Siriane.
Ndërkaq, forcat ushtarake ruse i kanë kërkuar presidentit Vladimir Putin të japë urdhër për rinisjen e sulmeve ajrore në lindje të Halepit për shkak të aktivitetit të shtuar të militantëve. Një kërkesë së cilës, siç njofton Russia Today, nuk i është dhënë përgjigje pozitive nga Putin. /tesheshi.com/
