Tajfuni Koppu ka përfshirë Filipinet duke shkatërruar qindra shtëpi në verilindje të shtetit. Si pasojë e tajfunit mbi 10 mijë banorë janë detyruar të braktisin banesat e tyre në verilindje të Luzon, ishullit kryesor të shtetit.
Momentalisht, siç referojnë autoritetet vendore, nuk ka të dhëna për viktima apo të lënduar. Tajfuni që ka përfshirë Filipinet është i kategorisë së tretë me erë deri më 185 km/h dhe shira të fortë, të cilët kanë provokuar dallgë në det dhe dëmtime të rrugëve e urave në qytetin Casiguran, në provincën Aurora.
Ndër të tjera, disa linja elektrike dhe telekomunikimi kanë dalë jashtë shërbimit. Autoritetet kanë bërë me dije se 30 udhëtime ajrore dhe shërbime trageti në veri të vendit janë anuluar. Disa linja autobusi kanë shtyrë oraret, për shkak të rrezikut të parashikuar në pjesën e maleve. Zyra meteorologjike ka bërë me dije se Koppu do të qëndrojë në zonën e Luzonës edhe për tre ditë të tjera./tesheshi.com/
