Për herë të parë në festën e Partisë Socialiste të këtij viti që u zhvillua sot në mbrëmje ka marrë pjesë një përfaqësues i Partisë Demokratike. Një shenjë kjo ndoshta e një klime që zbut pak antagonizmin armiqësor mes dy forcave kryesore shqiptare. Në lulishten e Teatrit Kombëtar, ka marrë pjesë nga selia blu ish-kryetari i PD dhe ish-Ministri i Jashtëm i Shqipërisë, Tritan Shehu.
Partia Socialiste ka festuar sot 24vjetorin e themelimit të saj në ambientet e restauruara të Teatrit Kombëtar.
Para dhjetëra të pranishëmve, kryesocialisti Rama ka zgjedhur të mbajë një fjalim që lidhej më tepër me fitoren e 21 qershorit dhe reformat e qeverisë, sesa me kalvarin që prej vitit 1991 të partisë që ai drejton. Rama u shpreh se në festë ishte ftuar edhe kreu i demokratëve, Lulzim Basha, i cili gjithashtu e ka ditëlindjen më 12 qershor, pra në një ditë me PS-në.
“Dua të uroj gjithashtu për ditëlindjen kreun e opozitës, Lulzim Basha. E ftova të ishte këtu dhe do të isha i lumtur të vinte, por nuk erdhi. Do e falenderoja për nismën e tij personale për referendumin kundër reformave të qeverisë” – u shpreh Rama duke e cilësuar fushatën e PD gjatë zgjedhjeve si një kërkesë për një votë popullore kundër reformave.
“Jam i bindur se miku i të gjithëve, Tritan Shehu që është sot këtu, do ta informojë hollësisht për
urimet e mia” – tha Rama. Ai u shpreh se përpara ka sfida të jashtëzakonshme, ndërsa tha se Partia Socialiste gjatë këtij viti duhet të jetë një hapësirë e re për të gjitha forcat që vinë nga çdo cep i Shqipërisë.
Në fjalën e tij, kryeministri Edi Rama nuk ka ngurruar të bëjë disa batuta me aleatët e vet. “Fituam së bashku edhe me socialistët e Ilirit, i cili vazhdon të heqë peshë nga vetja duke ia shtuar LSIsë.
Me demokratët e presidentit Topi që ketë herë fitoi se besoi tek shprehja trim i mirë me shokë shumë. Sikur Skënderi mos të kishte dal i vetëm në luftë, s’do kishte mbetur asnjë jashtë fitores”, tha Rama.
Ai vazhdoi me Spartak Ngjelën, duke thënë se është unik në llojin e tij. Sipas Ramës, Ngjela është edhe aleat i kësaj mazhorance, por edhe kundërshtar i egër i saj.
Në fillim të festës së organizuar për 24 vjetorin e themelimit të PS, Kryeministri falenderoi të pranishmit, por edhe cdo socialist, jo vetëm për ditëlindjen e Partisë Socialiste, por edhe për fitimin e zgjedhjeve vendore të 21 Qershorit.
/tesheshi.com/
