Nga Blendi Gashi
PDK e Kadri Veselit po e përjeton shumë keq “rënien në tuç” nga Vetëvendosja, në zgjedhjet fundit, ku, nëse gara nuk do ishte mes koalicioneve por mes partive, Albin Kurti do ishte lehtësisht në krye të qeverisë, ndërsa Veseli e Thaçi do e qanin me lot humbjen e pushtetit.
Dhe kjo përvuajtje politike po shihet qartë në llojin e luftës që ka zgjedhur PDK-ja ndaj VV-së, edhe prej frikës së mos Albini realisht e kap qeverinë, meqë PAN-i me Ramushin kandidat dhe Veselin aksioner kryesor, nuk po mundet t’ja dalë dot me formimin e një qeverie të re.
Siç dihet, VV ka vetëm një pushtet, vetëm një model qeverisjeje: Prishtinën nën Shpend Ahmetin. Dhe pikërisht aty është përqëndruar artileria e akuzave intensifikuar së fundi. Por lloji dhe forma, ngjajnë si dy pika uji me ato që vetë VV ka aplikuar si opozitë e ashpër politike, ndaj qeverisjes qëndrore me PDK-në si parti kryesore.
Prova më e fundit ishte një konferencë shtypi, ku jo një, por tre figura të PDK-së, dolën para publikut duke numëruar mëkatet e vetëvendosësit Shpend: Blerand Stavileci ministër në detyrë i Zhvillimit Ekonomik, njëherit zëdhënës i partisë; Shemsi Veseli zv.ministër i Shëndetësisë; dhe ish-gazetarja Arbana Xharra e cila aktualisht është ndër gratë e PDK-së që i rri më së afërmi Veselit.
Kjo trio mëtoi të servirte në mënyrë të detajuar keqqeverisjen e pretenduar të Ahmetit, si për të përçuar mesazhin se nëse Prishtina ka rënë në këtë derexhe, si ajo mund të katandiset e tërë Kosova, nëse Albini, shoku politik i Shpendit, bëhet kryeministër. Por tej kësaj, ajo që dallon si fenomen është forma e zgjedhur. Gjuha e PDK-së është qartazi e huazuar nga ajo e “armikut”, VV, duke rënë në grackën e të menduarit se me të njëjtat akuza ndaj nesh siç u rrit Vetëvendosja, kështu do i përgjigjemi dhe ne.
Provë për këtë është dhe fakti se PDK nuk po denoncon ngjashmërisht udhëheqje të tjera komunash me të dhëna korruptimi, siç në Pejë, Istog, Suharekë ku qeverisë LDK-ja, apo edhe në Junik e Deçan ku qeverisë AAK-ja.
Nga ana tjetër, ky është tregues i faktit se rival kryesor, tashmë PDK ka VV-në e jo LDK-në apo të tjera parti.
Nga ana tjetër, trioja e PDK-së nuk dha asnjë sqarim se si do e sfidonte Shpend Ahmetin në Prishtinë, në zgjedhjet e afërta lokale. Deri më tani nuk ka asnjë të dhënë që njeriut të Vetëvendosjes t’i kenë rënë aksionet e përkrahjes në elektorat.
Përkundrazi, rezultati që morri VV ishte tregues se i ka ende të larta. /tesheshi.com/
