Nga Mensur Krasniqi
Të vetëdijshëm që e gjithë vëmendja e shqiptarëve tani më është fokusuar tek akuzat dhe informacionet kriminale, përfshirë këtu edhe seks-skandale të funksionarëve të lartë të BDI-së , që po i shpërndan gazetari kontravers, Zoran Bozhinovski disa muaj me rradhë, ky subjekt që po përfaqëson shqiptarët e Maqedonisë, pra BDI, ka reaguar së fundmi me një deklaratë ku thuhet se: “të gjitha këto janë shpifje ndaj neve që vijnë nga Beogradi dhe frymëzohen në Shkup”.
Zoran Bozhinovski, ndryshe njihet si njëri ndër gazetarët që ka shpalosur shumë informacione skandaloze ndaj VMRO-DPMNE-së , por kohët e fundit nuk po e kursen as BDI-në. Ai brenda një muaji nxorri në publik disa fakte që sipas tij dëshmojnë mbi atë se kush e kurdisi rastin e Kumanovës; sharrjet e fyerjet mes funksionarëve të BDI-së; dhe kjo e fundit para 4 ditëve me seks-skandalin e drejtorit të spitalit psikiatrik, Qamil Kovaçi me një të mitur.
Gazetari Zoran Bozhinovski i pakënaqur dhe i frikësuar nga mosfunksionimi i drejtë isistemit juridik shtetëror, për momentin jeton dhe vepron në Serbi.
Por ajo çka është interesante nga reagimi i BDI-së, ku thuhet se qysh më parë kishin paralajmëruar qytetarët që në një farë mënyre t`i mbyllin veshët nëse paraqiten shpifje dhe akuza ndaj tyre, është se sipas tyre, e gjithë kjo ndodhë në mënyrë që shërbimet e Beogradit të nxisin përçarje tek shqiptarët.
“Kohë më parë paralajmëruam qytetarët se në muajt në vijim do të vërshohen nga shpifje të tmerrshme dhe akuza nga më të ndryshmet me të vetmin qëllim që të dëmtojnë BDI-në, imazhin e kryetarit Ahmeti si dhe të nxisin përçarje në radhët politike të shqiptarëve. Djemtë dhe vajzat më të mira të kombit nga Ushtria Çlirimtare Kombëtare janë të radhitur në Bashkimin Demokratik për Integrim dhe sot punojnë me po të njëjtin përkushtim sikur në vitin 2001, për të avancuar të drejtat kolektive shqiptare, drejt barazisë së plotë midis komuniteteve shumicë në vend. Kjo fushatë e koordinuar dhe e planifikuar gjatë kohë në qarqe të caktuara, për fat të keq po gjen përkrahje indirekte edhe tek disa subjekte të vogla shqiptare, të cilat me oportunizëm po vihen në shërbim të dëmtimit të organizimit politik shqiptar në Maqedoni. Fushata e pandershme e shpifjeve dhe konstruksioneve të vazhdueshme, as kësaj radhe nuk do të gjejë përkrahje tek qytetarët shqiptarë. Kjo fushatë antishqiptare, gjithnjë e më tepër po përballet me një mobilizim masovik të të gjitha strukturave të Bashkimit Demokratik për Integrim, që do të rezultojë me një fitore plebishitare në zgjedhjet e parakohshme të vitit 2016”, thuhet në kumtesën e BDI-së.
Vlen të theksohet se së fundi, gazetari Bozhinovski publikoi edhe bisedat e përgjuara të ish-komandantëve të vrarë të UÇK-së, Beg Rizaj dhe Hamdi Ndrecaj; biseda të tjera që ndërlidhen me ngjarjet e 9 dhe 10 majit në Kumanovë; fotografi nga vrasja e një ish-komandanti të UÇK-së në Kumanovë; detaje për vrasjen e komandant Shqiponjës, si dhe shumë materiale të tjera, që atakojnë edhe Ministrinë e Brendshme dhe pushtetin e Nikola Gruevskit.
Por materialet që po publikon Bozhinovski deri sot asnjëherë nuk janë komentuar nga ana e autoriteteve zyrtare të sigurisë në Shkup dhe nga personat që janë thirrur më shumë në ato biseda të publikuara, përfshirë këto zyrtarë partiakë të partisë Bashkimi Demokratik për Integrim. /tesheshi.com/
