Nga Bujar M. Hoxha
Abu Dhabi, 26 nëntor…
Një lamtumirë në Formula 1, përfundimtare këtë herë…
Felipe Massa ka mbërritur në fund të rrugëtimit të tij në sportin e shpejtësive ekstreme, pa mundur të shpallet asnjëherë kampion, edhe pse vite më parë do t’i afrohej suksesit.
Lamtumira e tij nuk është thjesht personale, por shënon fundin e një plejade pilotësh brazilianë që i dhanë në dekada tonin Formulës 1, qoftë me titujt e fituar apo me pilotimin e tyre fantastik, shpesh mjaft të rrezikshëm, paguar dhe me çmimin e jetës.
Një traditë e gjatë është mbyllur, nisur nga kampionët Fittipaldi, Nelson Piquet, Ayrton Senna, e ndjekur nga Rubens Barrichello dhe Felipe Massa, të pafat në përpjekjen e tyre për të bërë të njëjtën gjë.
Vdekja tragjike e Ayrton Senna-s, një prej pilotëve më spektakolarë në historinë e Formulës 1, në nisje të majit të 1994-s do të përjetohej si dramë në vendin e tij, të dhënë aq shumë pas këtij sporti. Barrichello e Massa do të ishin pasues të denjë të udhës së tij, pa kapur gjithsesi majat, pasojë e mungesës së tharmit të poseduar nga Senna.
Felipe Massa do të debutonte në Formula 1 në vitin 2002, me një Sauber, në Çmimin e Madh të Australisë. Fitorja e parë do të vinte katër vite më vonë, kur tashmë gjendej i ulur te njëvendëshja kokëkuqe, te Ferrari, të cilin ai e bëri të fluturonte në Stamboll, në Çmimin e Madh të Turqisë. Po në 2006-n, ai do të triumfonte në Interlagos, siç nuk kishte bërë asnjë pilot tjetër brazilian që nga 1993-shi, kur atë garë e fitonte Ayrton Senna.
Shok skuadre me të madhin Michael Schumacher, atë do ta përndiqte për pak kohë hija e tij, siç kishte ndodhur më herët me Barrichello-n. Për të patur shpejt në krah Raikkonen-in apo Alonso-n.
Shpesh gabimtar në pilotim, gjë për të cilën do të fajësohej periodikisht, kulmi i karrierës së tij do të ishte sezoni i 2008-s, kur do ta humbiste titullin për vetëm një pikë. Për fatin e keq të pilotit brazilian të Ferrari-t, Lewis Hamilton do të parakalonte në metrat e fundit gjermanin Timo Glock, që më tepër ngjante si një hapje rruge, në të fundit garë sezonale. Massa do ta kalonte finishin i pari në Interlagos, në festë për titullin, pa e ditur se ç’po ngjiste pas tij. Vendi i pestë i dha britanikut trofeun e kampionatit!
Që aty do të niste dalëngadalë tatëpjeta. Rol kyç do të kishte aksidenti i një sezoni më pas, në provat zyrtare të Çmimit të Madh të Hungarisë, kur Massa do të goditej në kokë nga një pjesëz makine e shkëputur nga njëvendëshja e Barrichello-s. Braziliani do të mëkëmbej shpejt, por kurrë nuk do të ishte më i pari. Diçka do të mungonte që atëherë tek ai, edhe pse do të pilotonte për shumë vite të tjera.
Nga Ferrari do të kalonte te Williams në vitin 2014, i nisur tashmë drejt fundit të karrierës, me vetëdije të plotë se kampion nuk do të mund të bëhej. 11 fitoret dhe 41 podiumet mbetën krenaria e tij, pa mundur ta bënin ngadhënjyes.
Felipe Massa i dha fund karrierës së tij të gjatë në Formula 1, e bashkë me të i vuri kapak një tradite. Asaj të pilotëve të pasionuar brazilianë, pa të cilët ky sport vështirë të jetë më si më parë. /tesheshi.com/
