Ministri i Brendshëm, Fatmir Xhafaj, ka firmosur urdhërin për fillimin e Vettingut në radhët e Policisë së Shtetit, Gardës së Republikës dhe SHÇBA-së.
Në urdhër parashikohet ngritja e strukturave që do të përgatisin proçesin e verifikimit të pastërtisë së figurës, integritetit dhe aftësive profesionale të punonjësve të strukturës policore.
Grupi i punës do të kryesohet nga zv.ministri i Brendshëm dhe do të asistohet nga misionet e asistencës së BE-së (Pameca V) dhe ShBA-së (ICITAP), si dhe ekspertë të mirënjohur ndërkombëtarë.
Kontributi aktiv i asistencës ndërkombëtare do të ndihmojë për zhvillimin e një proçesi teknik sa më profesional, transparent dhe të besueshëm.
Ndër detyrat kryesore të punës së këtij grupi parashihen: analiza e gjendjes aktuale si dhe hartimi e propozimi i një pakete të plotë ligjore, për realizimin e këtij proçesi Vettingu, që duhet të dorëzohet brenda këtij fundviti.
Ky proçes është pjesë e prioriteteve të Ministrisë së Brendshme dhe synon verifikimin e pastërtisë së figurës, pasurisë dhe aftësive profesionale (Vetting) të punonjësve të Policisë së Shtetit, Gardës së Republikës e Shërbimit të Çështjeve të Brendshme dhe Ankesave në Ministrinë e Brendshme.
Proçesit të Vettingut do t’i nënshtrohen të gjithë punonjësit e strukturave të mësipërme pa përjashtim, në të gjitha nivelet, nga drejtuesi më i lartë deri te specialisti më i thjeshtë. /tesheshi.com/
