Rusia do ta humbasë betejën energjetike që po udhëheq kundër Perëndimit, beson Fatih Birol, drejtor ekzekutiv i Agjencisë Ndërkombëtare të Energjisë (IEA), i cili gjithashtu vlerëson se ky dimër do të jetë i vështirë për botën, por dhe “tjetri mund të jetë edhe më i vështirë”.
“Menjëherë para pushtimit të Ukrainës, rreth 65 për qind e totalit të eksporteve të gazit rus shkoi në Evropë. Evropa ishte deri tani tregu më i madh, klienti më i madh rus dhe Rusia e ka humbur këtë klient më të madh përgjithmonë”, tha Birol në një intervistë për Euroneës.
I pyetur nëse Rusia mund të zëvendësojë klientët evropianë me ata nga rajone të tjera, Birol tha se nuk do të jetë e lehtë sepse një pjesë e madhe e gazit rus buron nga Siberia Perëndimore dhe më pas rrjedh në Evropë përmes tubacioneve të gazit.
Ai konfirmoi se ndërtimi i tubacioneve krejtësisht të reja të gazit në Kinë ose Indi mund të zgjasë deri në dhjetë vjet dhe do të kërkonte shumë teknologji dhe investime.
“Nuk po shet qepë në treg, por gaz natyror. Kjo është një punë tjetër”, tha Birol.
Një krizë ndërkombëtare me përmasa të paprecedentë
Duke folur për krizën ndërkombëtare, Birol tha se është një krizë me përmasa dhe shtrirje të paprecedentë, e cila po shkakton shkatërrime në të gjitha anët e botës.
“Jemi në mes të krizës së parë të vërtetë globale të energjisë. Bota jonë nuk ka dëshmuar kurrë, kurrë një krizë energjetike të kësaj thellësie dhe kompleksiteti. Në vitet 1970 kishim një krizë nafte, por ishte vetëm nafta. Tani kemi naftë, gaz natyror, qymyr, energji elektrike. Arsyeja është shumë e thjeshtë: Rusia është eksportuesi më i madh i energjisë në botë”, tha kreu i IEA.
Birol e përshkroi Evropën si “epiqendrën” e stuhisë dhe deklaroi se ishte e gabuar që ajo u mbështet në karburantet e lira ruse për dhjetëra vjet.
Kreu i IEA tha se kontinenti do të jetë në gjendje të kapërcejë dimrin e pritshëm pa dëme të mëdha në aspektin ekonomik dhe social, por vetëm nëse dimri nuk është shumë i gjatë dhe shumë i ftohtë.
Megjithatë, ai shprehu shqetësim më të madh për dimrin e ardhshëm dhe dimrin e vitit 2024.
Ai deklaroi se është i shqetësuar për tre gjëra: mungesën e gazit rus në Evropë, rimëkëmbjen ekonomike të Kinës dhe kushtet më të shtrënguara në tregjet e gazit të lëngshëm natyror.
“Në vitet e ardhshme ne duhet të jemi gati të përballemi me çmime të paqëndrueshme dhe të larta të energjisë dhe duhet të gjejmë zgjidhje. Të jem shumë i sinqertë, ky dimër do të jetë i vështirë, ndërsa ai i ardhshëm mund të jetë edhe më i vështirë”, tha Birol. /tesheshi.com/
