Një prej talenteve të futbollit shqiptar, ende i panjohur, është dhe Indrid Tuci.
Një 16-vjeçar nga Laçi, ai aktualisht po aktivizohet Akademinë U 17 të drejtuar nga Alan Bushi. Vetë ai e quan ende herët afirmimin publik si një talent, ku modestisht ecën me parimin se “është ende i vogël për t’u trajtuar si i madh”.
Por këtu do evidentojmë diçka të veçantë që ka ndodhur me të së fundi, e cila ka dhe humorin brenda. Para dy javësh, ekipi i tij u ndesh me atë të Laçit, qytetit prej nga vjen, ku Indriti shënoi dy gola dhë bëri një lojë të shkëlqyer.
I pranishëm në stadium edhe Dedë Ndreca, ish-futbollisti dhe trajneri i njohur i Mamurrasit, i cili nxiton më pas të interesohet për të dhe madje t’i bën ofertën për të luajtur në ekipin e tij.
Por talenti 16-vjeçar është detyruar t’i thotë se kjo është e pamundur pasi drejt tij kanë vërshuar ofertat nga Italia për të luajtur atje.
Dhe më saktë është klubi i Napolit që e kërkon, pasi pak vite më parë, në një turne moshash zhvilluar aty, Tuci ka shënuar një gol prej 25 metrash dhe ka treguar një formë të shkëlqyer që i ka habitur të gjithë.
Tërheqëse tek ai është shtati i lartë, 1.88, potenca, zhdërvjelltësia dhe forca goditëse. Ai padyshim që pritet të jetë një ndër emrat e njohur të futbollit shqiptar, e pse jo dhe atij italian.
A. Zani – /tesheshi.com/
