Marrëveshja e paqes e nënshkruar muajin e shkuar në Havanë mes qeverisë kolumbiane dhe Forcave të Armatosura Revolucionare të Kolumbisë është miratuar nga grupi rebel në mënyrë të njëzëshme.
FARC-u e ka miratuar marrëveshjen mes radhëve të tij, duke i dhënë fund një lufte pesëdekadëshe e duke i hapur rrugën kthimit në një parti të re politike.
Të mbledhur në një kongres, luftëtarëve të FARC-ut u ka folur dje udhëheqësi i tyre, Rodrigo Londono, i njohur si Timochenko.
“Paqja është më e bukura e fitoreve,” u tha ai luftëtarëve, duke paralajmëruar një faqe të re në historinë e Kolumbisë.
Marrëveshja parashikon vazhdimin nga FARC-u të kërkimit të ndryshimit shoqëror si një parti politike. Një kongres tjetër i lëvizjes do të mbahet majin e ardhshëm.
“E informojmë vendin dhe qeverinë se delegatët rebelë të kongresit i kanë dhënë mbështetje të njëzëshme mbështetjes së marrëveshjes përfundimtare,” deklaroi Ivan Marquez, komandanti i FARC-ut.
Marrëveshja do të nënshkruhet të hënën nga presidenti i vendit, Juan Manuel Santos, dhe Timochenko.
Për marrëveshjen do të ketë dhe një referendum më 2 tetor, ku pritet që kolumbianët ta votojnë atë masivisht.
Marrëveshja është historike, dhe u jep fund më shumë se pesë dekadave luftë civile, prej së cilës janë vrarë mbi 250.000 njerëz. /tesheshi.com/
