Analisti kosovar, Fadil Maloku ka renditur 7 arsye se përse sipas tij duhet protestuar nesër në Prishtinë, por ama qetësisht, siç potencon ai, pra duke qenë kundër dhunës po pro të protestuarit, të reaguarit. Më poshtë, është një shënim i tij i thukët, që i paraprin protestës së nesërme të opozitës kosovare që kundërshton Zajednicën dhe Demarkacionin, dy marrëveshjet e nënshkruara në Bruksel.
Çmotivimi (lexo; frikësimi!) i qytetarëve për të mos (demonstruar; qetësisht paknaqësinë e vetë!) protestuar me 28 Nëntor, kujtoj është shumëfisht i dëmshëm edhe për vetë qeverinë!
Ja përse;
1.E VRANË, qartë normën apo të drejtën (e garantuar edhe me Kushtetutë) elementare të standardit që e bënë demokracinë të pranueshme edhe për mentalitetin dhe etnopsikologjinë tonë sociale!
2.E FRUSTRON edhe atë pak ajke të guximit qytetarë që ka ide, zgjidhje, por, edhe qëndrime të drejta (fisnike) për cilindo problem të shfaqur në komunitet apo shoqëri! Pra, e ngulfat dukshëm aversionin antiqeveritar, që në faza tjera emancipuese mund të shndërrohet shumë lehtë në revoltë masive dhe të pandalshme!
3.E STIMULON edhe më tej si korrupsionin, krimin,nepotizmin, ashtu edhe diferencimin e natyrshëm midis shtresave sociale…! Shkaku, se transparenca dhe përgjegjësia publike tani bëhen “produkte made qeveria”!
4.E PARAGJYKON shtetndërtimin si një proces që gjëja paska vetëm nevoja ekskluzive politike (duke i margjinalizuar ato; ekonomike, juridike, kulturore, etj.), dhe se me metoda makiaveliste mundet të zhvendoset (qëllimshëm!) vëmendja kah (do qeveria e jo publiku!) problemet krejt inegzistente!
5.E PROBLEMATIZON qëllimshëm idenë sekondare (të protestës!) në mënyrë që ta fshehë paftësinë e vetë për t’u dal ball obligimeve (200.000 dhe 120.000 vende të reja pune!) qytetare për mirëqenien !
6.E STIGMATIZON gabimisht opozitën (e vogël në numra, por të zëshme dhe konsekuente në qëndrime!), në vend që ta josh (lexo; obligon ligjërisht, jo moralisht!) me obligime e sanksione shtetërore dhe ato nacionale!
7.E DEGRADON (por, edhe varros!) përfundimisht shpresën kolektive për proceset e reja integruese Europiane, duke hapur kështu shtigje tjera për arratisje edhe më të dendura jasht vendi! Duke krijuar kështu perceptimin e gabuar se: qytetarët kosovar realisht mbesin edhe më tej “të burgosur kolektiv”, me këtë qeverisje që punon vetëm pë vetën e vetë, klanin, partinë… e jo shtetin (e munguar!), sovranitetin (e rrejshëm!), demokracinë (e improvizuar!) dhe kombin!
/tesheshi.com/
