Nesër do të pilotohet për herë të fundit për këtë sezon në Formula 1. Në Abu Dhabi, aty ku do të zhvillohet gara e fundit, janë dy pilotë të një skuadre që do të luftojnë fort për të dalë fitues e për t’u shpallur kampion.
Lewis Hamilton, piloti britanik i Mercedes-it, synon titullin e katërt, e të tretin radhazi, por jo çdo gjë varet nga ai, pasi në klasifikim ka 12 pikë më pak se rivali i tij.
Nico Rosberg është në kërkim të shpalljes për herë të parë kampion bote në Formula 1, dhe nesër i mjafton një vend i tretë në garë, po qe se i pari del Hamilton, për ta bërë të tijin titullin.
Mes këtyre dy pilotëve luftohet të dielën gjithashtu në Abu Dhabi për fitoren e dhjetë sezonale, pasi të dy kanë triumfuar në nëntë prej garave.
Në provat e sotme zyrtare, të sapopërfunduara, Hamilton ka dalë i pari; koha më e mirë e Rosberg-ut e pozicionon atë në vend të dytë nesër në nisje.
Pas tyre vjen një Red Bull; ai i Ricciardo-s. Dhjetëshen e parë në startin e nesërm e plotësojnë Raikkonen, Vettel, Verstappen, Hulkenberg, Perez, Alonso dhe Massa.
Ashtu si provat zyrtare, dhe gara nesër do të nisë në 14:00. /tesheshi.com/
