Nga Eva Gjura
Deputetja e Partisë Socialiste Evis Kushi në një intervistë për ‘tesheshi.com’, shpjegon arsyen e rikandidimit të Qazim Sejdinit në Elbasan dhe reagimit të PS-së për aleancën me PDIU në bashkinë e Peqinit. Zonja Kushi, shprehet e bindur në fitoren e mazhorancës në zgjedhjet lokale. Duke u ndalur në qarkun e Elbasanit, zonja Kushi thekson se e majta në këtë qark garon me kandidatët më të mirë, të cilët kanë dalë pas konsultimeve me bazën e partisë dhe që garantojnë fitoren e sigurtë.
Në qarkun e Elbasanit tashmë janë zbuluar emrat e kandidatëve për zgjedhjet e pushtetit vendor. Mendoni se do te keni rezultate pozitive me këto kandidatura?
Pa dyshim, ne presim rezultate shume pozitive në këto zgjedhje për të gjithë kandidatët e propozuar nga Aleanca për Shqipërinë Europiane, dhe jo vetëm në Bashkinë e Elbasanit, por edhe në bashkitë e tjera të qarkut.
E majta ia ka besuar serish bashkinë më të madhe të qarkut, atë të Elbasanit kryetarit aktual Qazim Sejdini, nuk ju tremb kjo provë?
Unë nuk e konsideroj aspak provë rikandidimin e z. Sejdini, dhe jo vetëm që nuk më tremb, por përkundrazi besoj që është kandidatura e duhur që garanton fitoren në Elbasan. Sigurisht që ky vendim u bazua së pari në një analizë të thellë të punës së bashkisë gjatë këtyre viteve të fundit. Dhe rezultatet e kënaqshme janë të dukshme dhe të prekshme për të gjithë qytetarët. Gjithashtu, edhe konsultimet e bëra me të gjithë faktorët dhe aleatët e partive të tjera të koalicionit treguan që z. Sejdini është një kandidaturë konsensuale që siguron numrin maksimal te votave. Pa dyshim që popullariteti dhe reputacioni i tij pozitiv u konfirmuan edhe nga të gjitha sondazhet e realizuara muajt e fundit nga Partia Socialiste, sipas të cilave ne presim një fitore të thellë në këtë bashki.
Siç është deklaruar në media, bashkia Peqin, do t’i lihet një partie tashmë alete e së majtës, PDIU, por duket se ky vendim nuk është pritur mirë nga deputetët e qarkut të Elbasanit, pse kjo kundërshti, kur dihet se përsa kohë ka aleanca ka edhe zona të lira?
Unë nuk jam në dijeni të këtyre reagimeve. Por, përderisa PDIU është tashmë një parti aleate në këto zgjedhje, unë kam besim të plotë që strukturat e Partisë Socialiste në Peqin do të mobilizohen fort për të siguruar fitoren e Aleancës sonë edhe në këtë bashki.
Çfarë do të bëni ju si deputetë të mazhorancës për qarkun e Elbasanit për të marrë votat e atyre që gjithmonë njihen si votuesit gri, ose si të pavendosurit, por që koha ka treguar se nuk janë të paktë?
Unë mendoj që tashme numri i votuesve gri në Elbasan është reduktuar shumë, nga njëra anë për shkak të rezultateve pozitive të punës së bashkisë, dhe nga ana tjetër për shkak të kujdesit dhe vëmendjes së veçantë të qeverisë për këtë qytet. Unë do të përmendja fillimin e punës për impiantin e përpunimit të mbetjeve, stadiumin e ri Elbasan Arena, shumë rrugë të ndërtuara apo rikonstruktuara, e plot projekte dhe investime te realizuara me cilësi të lartë dhe brenda një kohe të shkurtër, si dhe të tjera që presin të marrin jetë së shpejti. Këtu do të shtoja sigurisht edhe shumë reforma të tjera të qeverisë në të gjitha fushat, si ekonomi, shëndetësi, arsim, etj.
Disa parti politike konkretisht ato opozitare kanë deklaruar dhe deklarojnë se zgjedhjet do të manipulohen ndaj kane kërkuar edhe bojkotin e tyre kam parasysh letrën publike te Aleancës Kuq e Zi. Keni ndonjë përgjigje për të, çfarë sigurie jep mazhoranca për këto zgjedhje se do të jene të lira dhe të ndershme?
Unë nuk mund të flas për paragjykimet e opozitës, sepse ato nuk janë të bazuara në fakte apo argumente. Maxhoranca në fakt është shumë e vendosur për të garantuar zhvillimin e zgjedhjeve të lira dhe të ndershme në 21 qershor. Ne madje po punojmë fort për forcimin e institucioneve shtetërore dhe për zbatimin e ligjit. Do të përmendja këtu vetëm një fakt të thjeshtë, maxhoranca nuk e ndryshoi përmbajtjen e Komisionit Qendror të Zgjedhjeve pasi e konsideron atë si një mekanizëm shumë të rëndësishëm për të garantuar standarde në zgjedhje. Ndërkohë janë shumë të mirëpritura të gjitha institucionet ndërkombëtare që do të monitorojnë mbarëvajtjen e procesit zgjedhor në të gjithë vendin.
Keni ndonjë koment për zhvillimet e fundit parlamentare, kam parasysh këtu arrestimet e dy deputeteve te mazhorancës mbi te cilët rendojnë disa akuza te renda?
Për këto çështje do të flasë drejtësia, prandaj le t’i japim asaj kohen e duhur për të marrë vendime të drejta dhe të paanshme.
/tesheshi.com/
