Britania e Madhe tha të hënën se me ngurrim kishte rënë dakord të priste Festivalin e Këngës në Eurovizion të vitit të ardhshëm, pasi organizatorët thanë se nuk kishte asnjë shans që eventi të mbahej në Ukrainën e shkatërruar nga lufta, raportoi AFP.
Kështu, BBC në vend të kësaj do të prodhojë atë që ata e kanë quajtur “konkurrenca muzikore më e madhe dhe më komplekse” në botë dhe do të fillojë të zgjedhë një qytet pritës në Mbretërinë e Bashkuar në bashkëpunim me Unionin Evropian të Transmetimeve (EBU).
Ukraina fitoi garën e sivjetme të organizuar nga Italia, përpara Britanisë së Madhe, e cila zuri vendin e dytë. Ukraina këmbënguli se mund të presë eventin pavarësisht pushtimit rus.
Megjithatë, EBU e përjashtoi këtë mundësi dhe televizioni ukrainas UA:PBC ra dakord që konkursi të mbahet në Britaninë e Madhe, por në “frymën ukrainase”.
“Eurovision Song Contest 2023 nuk do të mbahet në Ukrainë, por me mbështetjen e Ukrainës”, tha Mykola Cernoticki në një deklaratë të përbashkët nga EBU dhe BBC.
“Ne u jemi mirënjohës partnerëve tanë në BBC që treguan solidaritet me ne,” tha ai. /tesheshi.com/
